Анатоль Ісачанка павіншаваў выхаванцаў дома сямейнага тыпу з Краснаполля

Напярэдадні Новага года дзіцячы дом сямейнага тыпу Дзмітрыя і Алены Алепка з Краснаполля з падарункамі і віншаваннямі наведаў старшыня Магілёўскага аблвыканкама Анатоль Ісачанка.

Губернатара на ганку дома гуртам сустракалі дзеці і бацькі. Прыезду дарагога госця вельмі чакалі і рыхтаваліся: упрыгожылі дом, накрылі святочны стол, падрыхтавалі вершы, музычнае прывітанне і нават зрабілі ўласнымі рукамі падарункі. Такую шчырую ветлівасць і ўвагу Анатоль Ісачанка ўспрыняў з добрай усмешкай: зносіны з дзецьмі заўсёды прыносяць радасць і пазітыўныя эмоцыі.

«Дзеці – гэта наша ўсё: і сучаснасць, і будучыня. Як пакінуць дзіця без увагі? – адзначыў губернатар. – Напярэдадні такога свята, ды і не толькі, важна дайсці да кожнага маленькага жыхара краіны. На жаль, ёсць дзеці, якія хварэюць, ёсць тыя, якіх кідаюць бацькі ці ў іх не задаецца ў сям’і. Жыццёвыя сітуацыі бываюць розныя. У гэтым выпадку задача дзяржавы – зрабіць усё, каб дзеці не засталіся без увагі і клопату. Формы, падыходы, метады бываюць рознымі, але мэта адна – дзіця заўсёды павінна адчуваць сябе ў сям’і, быць патрэбным. Для гэтага ёсць падтрымка дзяржавы, якая і ёсць наш вялікі дом».

Дзіцячаму дому сямейнага тыпу Дзмітрыя і Алены Алепка 26 снежня споўнілася 15 гадоў. Бацькі выгадавалі дваіх сваіх дзяцей, а таксама за час працы прынялі на выхаванне 31 дзіця-сірату і дзіця, якое засталося без апекі бацькоў. Сёння ў доме пражываюць 2 хлопчыкі і 6 дзяўчынак ва ўзросце ад 4 да 15 гадоў. Усе яны здабылі тут моцную і дружную сям’ю, атрымалі клопат, любоў і павагу. «Дзеці робяць наша жыццё не лягчэйшым, але лепшым», – з усмешкай кажуць бацькі.

Па словах таты, каб у доме быў парадак і паразуменне, без пэўных правілаў не абысціся. Так, дзеці разумеюць, што трэба слухацца бацькоў, паважаць адзін аднаго, дапамагаць па доме. Алепка – вельмі актыўная сям’я, паспяваюць усюды і ва ўсім: вучыцца, займацца ў гуртках і секцыях, весці хатнюю гаспадарку. Дарэчы, летам па двары хадзіла больш за 180 птушак – залатыя фазаны, цацаркі, качкі-мандарынкі, курачкі і пеўнікі. Да зімы іх стала менш, але яны ўсё так жа патрабуюць належнага догляду. «У нас усё хатняе, крамныя прадукты для нас у навіну», – кажа мама Алена.

«Дзеці даюць адчуванне паўнаты і шчасця ў сям’і, – упэўненая Алена Алепка. – Першапачаткова мы не планавалі станавіцца прыёмнымі бацькамі, проста часта хадзілі ў прытулак і дапамагалі гэтым дзецям. А потым рашэнне прыйшло само сабой: трэба пашыраць сваю сям’ю. Сэрца кранула дзяўчынка Тася, якую не сталі разлучаць з двума братамі і іх сябрам. Месца ў хаце знайшлося ўсім. Гэта велізарная радасць, калі бачыш, як дзеці растуць, робяць свае першыя поспехі, мяняюцца разам з намі. Ды і мы з мужам побач з імі маладзеем і змяняемся як бацькі, за што мы ўдзячныя дзецям».

Старэйшая дачка Надзя кажа, што бацькі для яе – галоўны прыклад і жыццёвы арыенцір. Разам са сваімі трыма малодшымі сёстрамі і братам яна жыве ў доме ўжо каля 4 гадоў. Момант, калі набыла новую сям’ю, 15 гадовая дзяўчынка не можа ўспамінаць без слёз: «У адносінах да бацькоў у нас ёсць велізарная падзяка за тое, што яны нас прынялі і палюбілі. Нашы бацькі выдатныя, і прымаюць нас такімі, якія мы ёсць. Гэта вельмі важна. Запомнілася, як мы толькі трапілі ў дом, нас накармілі, пераапранулі, з усімі пазнаёмілі. Я іх прыняла, як сваіх родных бацькоў».

Анатоль Ісачанка ўпэўнены, што замяніць дзіцяці сям’ю складана, цяжка і часам нават немагчыма. Аднак сямейнае выхаванне павінна быць абавязкова, бо менавіта бацькі даюць дзецям дабрыню, цеплыню, ласку, увагу, а таксама разуменне дома і простага чалавечага шчасця быць любімымі. Садок, школа – гэта, безумоўна, добра, але сям’я – гэта ўсё-ткі больш. У сваю чаргу такія вялікія святы, як Каляды і Новы год, аб’ядноўваюць і гуртуюць усіх дамачадцаў.

«Новы год чакаюць і дарослыя, і дзеці. Усе вераць у казку і ў цуда, а часам дарослыя нават больш, чым дзеці. Гэтае свята – не толькі час віншаванняў і падарункаў, але таксама пэўны перыяд, калі падводзяцца вынікі, вызначаюцца планы і загадваюцца жаданні. Гэтае свята – добрае, хатняе, сямейнае. Я ўсіх віншую з надыходзячымі Новым годам і Раством і хачу пажадаць усяго найлепшага», – сказаў на заканчэнне губернатар.

БЕЛТА