Анкадыспансеры ў Магілёве і Бабруйску ў найбліжэйшы час вернуцца да аказання планавай дапамогі

Анкадыспансеры ў Магілёве і Бабруйску ў найбліжэйшы час цалкам вернуцца да аказання планавай дапамогі пацыентам. Пра гэта паведаміла першы намеснік начальніка галоўнага ўпраўлення па ахове здароўя Магілёўскага аблвыканкама Ірына Ляховіч.

«На дадзены момант у рэгіёне ідзе паступальны працэс вяртання ўстаноў аховы здароўя да аказання планавай дапамогі пацыентам. Такое рашэнне было прынята ў сувязі са стабілізацыяй сітуацыі з каранавіруснай інфекцыяй. Так, да звычайнага рэжыму працы ўжо вярнулася 180 ложкаў Магілёўскага абласнога анкалагічнага дыспансера. Акрамя гэтага, для аказання планавай дапамогі ў працу вярнулі яшчэ 40 ложкаў кардыялагічнага аддзялення Магілёўскай абласной клінічнай бальніцы», – адзначыла Ірына Ляховіч.

Па словах першага намесніка, у найбліжэйшы час да планавай працы цалкам вернецца дзве ўстановы аховы здароўя Магілёўскай вобласці – анкадыспансеры ў Магілёве і Бабруйску.

Да аказання планавай дапамогі ўсе перапрафіляваныя ўстановы аховы здароўя будуць вяртацца паступова. Перад прыёмам профільных пацыентаў у бальніцах і аддзяленнях правядуць работы па дэзынфекцыі і апрацоўцы паверхняў – гэта дазволіць выключыць магчымасць заражэння каранавіруснай інфекцыяй у стацыянарах.

БЕЛТА