Беларуска-Расійскі ўніверсітэт правядзе дадатковы набор на бюджэтныя месцы па тэхнічных спецыяльнасцях

У Беларуска-Расійскім універсітэце адбудзецца дадатковы набор на бюджэтныя месцы па тэхнічных спецыяльнасцях. Пра гэта паведаміў адказны сакратар прыёмнай камісіі ВНУ Аляксандр Кашпар.

«Сёлета ў БРУ пройдзе дадатковы набор на вакантныя бюджэтныя месцы па некалькіх тэхнічных спецыяльнасцях машынабудаўнічага напрамку падрыхтоўкі па адукацыйных праграмах Рэспублікі Беларусь. Традыцыйна ў абітурыентаў працягваюць карыстацца папулярнасцю IT і эканамічныя спецыяльнасці, аднак з боку наймальнікаў маецца высокая патрэба ў спецыялістах машынабудаўнічага профілю, – расказаў Аляксандр Кашпар. – Сёлета на кожнага выпускніка Беларуска-Расійскага ўніверсітэта машынабудаўнічых спецыяльнасцей паступіла да трох заявак ад працадаўцаў, што давала магчымасць выпускнікам выбіраць найбольш выгадныя прапановы. Але ў сувязі з памяншэннем колькасці абітурыентаў, якія здаюць на ЦТ фізіку, у гэтым годзе прахадныя балы трохі ніжэйшыя за леташнія. Так, на спецыяльнасць «аўтаматызаваныя сістэмы апрацоўкі інфармацыі» па беларускіх адукацыйных праграмах ніжні парог склаў 285 балаў, «электронны маркетынг» – 319, на «праграмную інжынерыю» (па праграмах Расійскай Федэрацыі) – 204 З 300. На спецыяльнасці па расійскіх праграмах прахадныя балы ніжэйшыя – тут не ўлічваецца сярэдні бал атэстата».

Па словах адказнага сакратара, у цэлым прыёмная кампанія прайшла ў спакойнай абстаноўцы. «Уступная кампанія праходзіць выразна і зладжана. З боку кантралюючых органаў заўваг не было. Мы праводзім прыём у адпаведнасці з нарматыўнымі дакументамі і рэкамендацыямі Міністэрства адукацыі і Міністэрства аховы здароўя. Падчас уступнай кампаніі ў ВНУ выконваюцца ўсе неабходныя супрацьэпідэмічныя меры – на першым месцы здароўе і бяспека як супрацоўнікаў універсітэта, так і нашых будучых студэнтаў», – падкрэсліў Аляксандр Кашпар.

Сёлета ў Беларуска-Расійскім універсітэце было адкрыта некалькі новых спецыяльнасцей, адна з якіх – «прыкладная матэматыка». Па словах Аляксандра Кашпара, сярод абітурыентаў новыя спецыяльнасці таксама выклікалі цікавасць. «Новыя спецыяльнасці, якія з’яўляюцца ў ВНУ, прадыктаваны патрэбай эканомікі краін Саюзнай дзяржавы. Мы сочым, каб нашы студэнты атрымлівалі якасную і запатрабаваную адукацыю», – адзначыў ён.

БЕЛТА