«Берагчы старонкі нашай гісторыі». У Магілёве адкрылі маладзёжны форум Саюзнай дзяржавы

Сёння ў Магілёўскім дзяржаўным універсітэце ім. А. А. Куляшова прайшло ўрачыстае адкрыццё маладзёжнага форуму Саюзнай дзяржавы «Роля моладзі ў захаванні і абароне гістарычнай памяці».

У Магілёве сабраліся маладыя дэпутаты, парламентарыі, гісторыкі, сярод якіх - вучоныя і выкладчыкі з Беларусі і Расіі. Учора яны прынялі ўдзел у адкрыцці фестывалю «Моладзь - за Саюзную дзяржаву», а ўжо сёння пачнуць працу па тэматычных секцыях.

Як зазначыў падчас адкрыцця рэктар МДУ ім. А. А. Куляшова і мадэратар адной з секцый Дзяніс Дук, у гісторыі магілёўскай ВНУ Вялікая Айчынная вайна пакінула свой незгладжальны след. «Многія нашы выкладчыкі, студэнты з першых дзён вайны пайшлі на фронт. І сёння памяць аб гэтых падзеях, якая праламляецца праз выхаванне маладога пакалення, з'яўляецца краевугольным каменем. І калі мы бачым спробы фальсіфікаваць гісторыю, бачым скажэнне гісторыі, то нашым студэнтам вельмі проста тлумачыць рэальны стан спраў. Мы вязем іх на месцы баявой славы, дзе равеснікі нашых студэнтаў пралівалі кроў. І калі хлопцы бачаць гэтую жывую гісторыю праз гісторыі сваёй сям'і, свайго ўніверсітэта, сваіх аднагодкаў, яны разумеюць, на чыім баку гістарычная праўда», - адзначыў ён.

Адна з місій ВНУ ў Магілёве - трансліраваць гістарычную праўду людзям. «І ў гэтым плане нам таксама ёсць на чым стаяць, бо калі мы гаворым праўду, то казаць яе вельмі лёгка. Генпракуратура кожны год устанаўлівае колькасць спаленых вёсак. Рахунак пераваліў далёка за 10 тыс. І зразумела, што калі мы называем гэтыя рэчы і паказваем карнікаў, якія палілі беларускія вёскі, называем іх імёны, ставіць помнікі антыгероям не ўзнікае думкі. Таму мы на правільным шляху. Мы прырастаем новымі фактамі, і гэтыя факты ўплятаем у агульную канву выхаваўчага працэсу ў працы з моладдзю».

Сярод тых, хто стаў удзельнікам форуму, - дацэнт кафедры ўсеагульнай гісторыі, выкладчыка Паўночнага (Арктычнага) федэральнага ўніверсітэта імя М. В. Ламаносава Герман Рагозін. Ён падзяліўся, што да вывучэння гісторыі яго прывёў і свой, асабісты інтарэс. «Мой прадзед Нікіфар Цітовіч Віннікаў у гады Вялікай Айчыннай вайны быў партызанам. Лічу, што захаванне гістарычнай памяці - гэта захаванне падмурка, на якім стаяць нашыя народы, захаванне нашых народаў як такіх. Бо гэта найперш частка нашай самасвядомасці. Гэта нашыя нацыянальныя алмазы, культурныя і духоўныя. І з гэтай мазаікі і атрымліваецца тая карціна, за кошт якой фармуемся і мы самі».

Малады чалавек зазначыў, што сучасная моладзь прымае эстафету захавання гістарычнай праўды і памяці і будзе перадаваць гэтую эстафету ўжо пакаленням будучым. «І сюды ўкладаюцца і гістарычныя даследаванні, і папулярызацыйныя праекты. Любоў да Радзімы пачынаецца, у першую чаргу, са ведання гісторыі сваёй Радзімы, як малой, так і вялікай. У беларусаў гэта добра атрымоўваецца. Сам неаднаразова ездзіў у вашу краіну, па розных яе кутках, і для сябе як гісторык прыкмеціў адну рэч - у вас атрымліваецца ўлічыць, па сутнасці, кожны з перыядаў гісторыі: старажытнасць, сярэднявечча, новы, найноўшы час. У вас атрымліваецца зберагчы старонкі, якія звязваюць нашыя краіны, Беларусь і Расію», - падсумаваў ён.

БЕЛТА