Царкоўным прадметам са Свята-Троіцкага сабора ў Хоцімску нададзены статус гісторыка-культурнай каштоўнасці

Органы пракуратуры Магілёўскай вобласці пры садзейнічанні Генеральнай пракуратуры ў парадку нагляду за выкананнем заканадаўства аб ахове гісторыка-культурнай спадчыны выявілі ў Свята-Троіцкім саборы гарадскога пасёлка Хоцімск аб’екты (царкоўнае адзенне, абразы, Евангелле), якім у адпаведнасці з кодэксам Беларусі аб культуры мог быць прысвоены статус матэрыяльнай гісторыка-культурнай каштоўнасці. Пра гэта паведамілі ў службе інфармацыі пракуратуры Магілёўскай вобласці.

Устаноўлена, што матэрыяльныя каштоўнасці (а многім прадметам больш за 300 гадоў) належаць ганароваму настаяцелю сабора архімандрыту Кірылу, які збіраў іх доўгі час. Па папярэдніх знешніх прыкметах яны валодаюць адметнымі духоўнымі, мастацкімі, дакументальнымі вартасцямі, уяўляюць значнасць з пункту гледжання гісторыі, мастацтва, культуры і могуць аказаць уплыў на культурнае і духоўнае развіццё беларускага народа.

Рэалізуючы наглядныя паўнамоцтвы і зыходзячы са згоды ўласніка матэрыяльных прадметаў архімандрыта Кірыла, пракуратура Хоцімскага раёна накіравала ў райвыканкам інфармацыю для арганізацыі працы, звязанай з вывучэннем пытання аб магчымасці надання названым аб’ектам спецыяльнага прававога статусу. Мэта – пашырыць Дзяржаўны спіс гісторыка-культурных каштоўнасцей, прысвоіць матэрыяльным каштоўнасцям адпаведны статус, папоўніць нацыянальную культурную спадчыну, стварыць прававыя гарантыі па папярэджанні іх страты, псавання і крадзяжоў, утварыць калідор для паломніцкага турызму.

У межах выканання даручэння пракуратуры Магілёўскай вобласці ўпраўленне культуры Магілёўскага аблвыканкама правяло планамерную і працяглую працу па падрыхтоўцы прапаноў аб наданні статусу гісторыка-культурнай каштоўнасці калекцыі царкоўных прадметаў. Гэтыя прапановы пасля разгледзелі на пасяджэнні Магілёўскага абласнога савета па пытаннях аховы гісторыка-культурнай спадчыны.

Як вынік – Магілёўскі аблвыканкам прыняў рашэнне аб прысваенні матэрыяльнай культурнай каштоўнасці «Камплекты царкоўных прадметаў (260 адзінак)» канца XVIII – XX стагоддзя, размешчанай у Свята-Троіцкім саборы гарадскога пасёлка Хоцімск, статусу гісторыка-культурнай каштоўнасці катэгорыі «3».

БЕЛТА