Чарговая трыццаць шостая сесія Магілёўскага абласнога Савета дэпутатаў адбылася ў Магілёве

Чарговая трыццаць шостая сесія Магілёўскага абласнога Савета дэпутатаў адбылася 17 лютага ў рэжыме відэаканферэнцыі. У ёй прынялі ўдзел члены Савета Рэспублікі Нацыянальнага сходу Рэспублікі Беларусь, дэпутаты Палаты прадстаўнікоў Нацыянальнага сходу Рэспублікі Беларусь і абласнога Савета дэпутатаў, члены аблвыканкама і кіраўнікі структурных падраздзяленняў, старшыні гарадскіх і раённых Саветаў дэпутатаў, гарадскіх і раённых выканаўчых камітэтаў, прадстаўнікі сродкаў масавай інфармацыі.

На разгляд сесіі было прадстаўлена 17 пытанняў, у тым ліку тых, якія тычацца ўдакладнення некаторых рашэнняў абласнога Савета дэпутатаў па частцы бюджэту, інвестыцыйнай праграмы і інш. Асноўнымі на парадку дня сталі справаздачы аблвыканкама і прэзідыума абласнога Савета дэпутатаў аб выніках дзейнасці ў 2021 годзе.

У працы сесіі прыняў удзел намеснік старшыні аблвыканкама Руслан Страхар, які адзначыў, што ў 2021 годзе праца Магілёўскага аблвыканкама была накіравана на рост дабрабыту грамадзян, забеспячэнне сацыяльнай стабільнасці, стварэнне ўмоў для развіцця чалавечага патэнцыялу.

«Асноўны ўпор быў зроблены на аднаўленне росту эканомікі за кошт павышэння прадукцыйнасці працы, стымулявання дзелавой актыўнасці і ініцыятывы, на павышэнне эфектыўнасці інвестыцыйнай дзейнасці, нарошчванне і дыверсіфікацыю экспарту, развіццё малога і сярэдняга прадпрымальніцтва, уключэнне яго ў імпартазамяшчальную вытворчасць, – падкрэсліў ён. – Па выніках 2021 года вобласцю забяспечана выкананне двух з чатырох мэтавых паказчыкаў, даведзеных урадам, па намінальнай налічанай сярэднямесячнай заработнай плаце і росце сукупных паступленняў даходаў у кансалідаваны бюджэт вобласці. Пры гэтым неабходна сказаць, што ва ўмовах сусветнай пандэміі, якая працягваецца, закрыцця межаў і ўзмацнення пратэкцыянізму на знешніх рынках, нам удалося забяспечыць рост валавога рэгіянальнага прадукту на ўзроўні 100,7%. Па-ранейшаму важнае месца ў развіцці рэальнага сектара эканомікі рэгіёна займае прамысловы комплекс, які на працягу апошніх пяці гадоў дэманструе стабільны рост».

У сваім выступленні старшыня Магілёўскага абласнога Савета дэпутатаў Ірына Раінчык падкрэсліла, што, нягледзячы на няпросты мінулы год, як вобласці, так і краіне ў цэлым удалося вытрымаць выпрабаванні пандэміяй, сусветным эканамічным крызісам, знешнім ціскам, дзякуючы стойкасці і вернасці абранаму шляху, патрыяртызму.

«У 2021 годзе дэпутацкім корпусам сумесна з органамі выканаўчай улады прымаліся ўсе неабходныя меры па захаванні стабільнай грамадска-палітычнай абстаноўкі ў рэгіёне. Асноўныя галіны рэальнага сектара эканомікі вобласці спрацавалі са станоўчай дынамікай. Гэта дазволіла выканаць шэраг прагнозных паказчыкаў. Немалаважна, што нам удалося захаваць станоўчы маральна-псіхалагічны клімат у працоўных калектывах. Усе прадпрыемствы і арганізацыі нашай вобласці працавалі ў штатным рэжыме, – адзначыла Ірына Раінчык. – Сёння мы не толькі падводзім вынікі 2021 года, але вызначаем далейшыя крокі, накіраваныя на развіццё нашага рэгіёна і ўмацаванне адзінства ў грамадстве. Галоўная грамадска-палітычная падзея мінулага года, якая выразна дала адказы грамадству, у якім кірунку краіна будзе рухацца, – гэта шосты Усебеларускі народны сход. Прэзідэнт Аляксандр Лукашэнка вылучыў ключавыя прыярытэты на пяцігодку: шчаслівая сям’я, моцныя рэгіёны, інтэлектуальная краіна і дзяржава-партнёр. Арыенціры ўсім зададзены, застаецца працягваць выразна рухацца да мэты. Ствараць новыя вытворчасці, укараняць перспектыўныя тэхналогіі, выпускаць на рынак запатрабаваныя прадукты, будаваць жыллё, нараджаць і выхоўваць дзяцей».

Таксама Ірына Анатольеўна адзначыла, што папярэдні Год народнага адзінства паказаў усяму свету згуртаванасць і ўстойлівасць беларусаў. Жыхары Магілёўшчыны наглядна прадэманстравалі адзінства і характар сапраўдных патрыётаў Радзімы. У кожным кутку Прыдняпроўскага краю прайшлі аўтапрабегі, мерапрыемствы ў падтрымку міру, згоды і адзінства на нашай зямлі. Падзеі ў Беларусі нікога не пакінулі абыякавым, людзі выказвалі свае меркаванні, якія хоць і былі рознымі, алеў той жа час адзінымі ў тым, што ўсе назапашаныя пытанні трэба вырашаць шляхам дыялогу.

«Дэпутацкі корпус і жыхары Магілёўшчыны актыўна ўключыліся ў гэты працэс. На пастаяннай аснове ў вобласці арганізавана праца дыялогавых пляцовак па актуальных пытаннях развіцця краіны і нашага рэгіёна, у 2021 годзе іх праведзена больш за тысячу. Арганізавана праца грамадскіх прыёмных, – адзначыла Ірына Раінчык. – Галоўнымі задачамі дэпутатаў з’яўляюцца захаванне міру і спакою ў нашым агульным доме, рост дабрабыту і ўпэўненасць у заўтрашнім дні, умацаванне суверэнітэту і незалежнасці нашай Беларусі.

Дэпутацкі корпус Магілёўшчыны працягне працу па рэалізацыі рашэнняў шостага Усебеларускага народнага сходу і палажэнняў Паслання Прэзідэнта беларускаму народу і Нацыянальнаму сходу. Нам неабходна прытрымлівацца ім у сваёй прафесійнай дзейнасці і паўсядзённым жыцці, сувымяраць з імі свае ініцыятывы і рашэнні, якія прымаюцца».

Прыярытэтам абласнога Савета дэпутатаў з’яўляецца праца з насельніцтвам.

«У цэнтры нашай работы застаецца чалавек, яго патрэбы і праблемы. Як і раней, неабходна задзейнічаць самыя розныя формы: асабістыя прыёмы грамадзян, прамыя тэлефонныя лініі, сустрэчы ў працоўных калектывах і з насельніцтвам па месцы жыхарства, выступленні ў сродках масавай інфармацыі, а таксама ў сацыяльных сетках. Важна быць шчыра зацікаўленым, не заставацца абыякавым і кожнае пытанне даводзіць да лагічнага рашэння. Дзейнічаць сістэмна, – акцэнтавала ўвагу старшыня абласнога Савета дэпутатаў. – Акрамя таго, апошнія падзеі паказалі, што дэпутацкі корпус вобласці павінен актыўна ўключыцца ў выхаванне грамадства свядомых грамадзян, падмуркам якога выступае імкненне да міру і адзінства. Трэба культываваць дух гераізму продкаў, якія адстаялі краіну ў Вялікай Айчыннай вайне. У нас ужо ёсць вопыт правядзення выязных пасяджэнняў Прэзідыума па пытаннях фарміравання грамадзянскасці і патрыятызму ў моладзі, круглых сталоў і іншыя формы. Дадзены кірунак варта істотна актывізаваць, арыентуючыся ў першую чаргу на маладое пакаленне. Актыўна задзейнічаць пры гэтым патэнцыял нашага Маладзёжнага парламента. З моладдзю важна весці дыялог на роўных, без фармалізму і фальшы».

Дарэчы, Маладзёжны парламент пры Магілёўскім абласным Савеце дэпутатаў сёння прымае актыўны ўдзел ва ўсіх грамадска-палітычных падзеях, якія адбываюцца ў краіне. Пра гэта расказаў Міхаіл Пагоцкі, намеснік старшыні Маладзёжнага парламента:

«У ліку іншага – гэта мерапрыемствы, якія былі прымеркаваны да Года народнага адзінства і звязаны з занятасцю і працаўладкаваннем моладзі. Гэта і міжнароднае супрацоўніцтва, якое мы наладзілі з Прыморскім краем, і ў далейшым будзем развіваць гэты кірунак дзейнасці. Таксама варта адзначыць, што мы ўшчыльную пачынаем працаваць з парламентарыямі розных узроўняў, ад раённых да Палаты прадстаўнікоў Нацыянальнага сходу Рэспублікі Беларусь. Літаральна сёлета мы плануем запусціць праект, згодна з якім кожны маладзёжны парламентарый будзе прымацаваны да канкрэтнага дэпутата. Такім чынам, наладжаная праца ў тандэме, сплаў маладосці і вопыту дазволяць дамагацца яшчэ больш высокіх дасягненняў».

У бягучы Год гістарычнай памяці дэпутаты, як адзначыла Ірына Раінчык, працягнуць актыўна ўдзельнічаць у мерапрыемствах, прысвечаных знакавым для Беларусі датам, юбілеям, звязаным з гісторыяй, навукай, культурай. Больш за тое, па магчымасці будуць станавіцца іх ініцыятарамі і арганізоўваць іх на сваіх пляцоўках, аб’ядноўваючы патрыётаў, неабыякавых грамадзян нашай вобласці.

«Сёння мы стаім на парозе гістарычнай падзеі – рэферэндуму па пытанні ўнясення змяненняў і дапаўненняў у Канстытуцыю Рэспублікі Беларусь. Упэўнена, што дэпутацкі корпус і жыхары Прыдняпроўскага краю прымуць актыўны ўдзел у ім, разумеючы самае важнае, што падкрэсліў у сваім пасланні кіраўнік дзяржавы: “Беларуская стратэгія развіцця можа быць толькі адна – ісці сваім шляхам, думаць галавой, жыць уласным розумам, будаваць будучыню на трывалым падмурку народнага адзінства”», – падвяла вынік свайго выступлення Ірына Раінчык.

Юлія Таранава, фота аўтара