23.12.2024 - 17:05

ЦВК зарэгістравала пяць кандыдатаў у Прэзідэнты Рэспублікі Беларусь: дзеючага Прэзідэнта Рэспублікі Беларусь Аляксандра Лукашэнку, старшыню Рэспубліканскай партыі працы і справядлівасці Аляксандра Хіжняка, старшыню Ліберальна-дэмакратычнай партыі Беларусі Алега Гайдукевіча, індывідуальнага прадпрымальніка Ганну Канапацкую, першага сакратара Цэнтральнага камітэта Камуністычнай партыі Беларусі Сяргея Сыранкова.

Ужо з 1 студзеня пачнецца перадвыбарная агітацыя. Сёння ж у ЦВК прайшла працэдура ўручэння пасведчанняў кандыдатам у Прэзідэнты Рэспублікі Беларусь.

Паводле слоў Алега Гайдукевіча, у Беларусі былі створаны ўсе ўмовы, каб дастойна прайсці этап па зборы подпісаў. «Хачу падзякаваць сваёй камандзе, таму што на самай справе вялікая работа праведзена, і мы змаглі сабраць больш за 100 тыс. подпісаў, - расказаў ён. - Кампанія праходзіць спакойна, людзі радасныя па вуліцах ходзяць, рыхтуюцца да Новага года. Хіба не так павінны выбары праходзіць? Усе кандыдаты розныя, у нас розныя праграмы, але аб'ядноўвае нас любоў да краіны і жаданне зрабіць яе мацнейшай».

«Цяпер агітацыя забаронена, - падкрэсліла Ганна Канапацкая. - Цяпер можна расказваць аб сваіх біяграфічных даных, задаваць пытанні аб тых праблемах, якія хвалююць грамадзян Рэспублікі Беларусь. Можна збірацца са сваёй камандай, рыхтаваць матэрыялы, выступленні, рыхтавацца да дэбатаў. Мы прайшлі складаны этап выбарчай кампаніі. Вельмі спадзяюся, што астатнія цыклы выбарчага працэсу мы ўсе пройдзем, выконваючы дзеючае заканадаўства, ва ўмовах сумленнай канкурэнцыі».

«Даволі сур'ёзны этап ззаду, - дадаў Сяргей Сыранкоў. - Этап, які быў прызначаны мабілізаваць партыю, праверыць яе на баявітасць у добрым сэнсе слова, зрабіць даволі сур'ёзнае палітычнае ўзварушванне ўсіх партыйных структур: ад пярвічкі да цэнтральнага камітэта. Упершыню ў гісторыі суверэннай Беларусі кандыдат ад Камуністычнай партыі зарэгістраваны ў якасці кандыдата ў Прэзідэнты Рэспублікі Беларусь».

Выбары Прэзідэнта Беларусі назначаны на 26 студзеня 2025 года.

БЕЛТА