Дэпутат: дзякуючы акцыі «Нашы дзеці» хлопчыкі і дзяўчынкі працягваюць верыць у цуды

Дзякуючы рэспубліканскай дабрачыннай акцыі «Нашы дзеці» хлопчыкі і дзяўчынкі працягваюць верыць у цуды, заявіла журналістам член Пастаяннай камісіі па правах чалавека, нацыянальных адносінах і сродках масавай інфармацыі Палаты прадстаўнікоў Людміла Здорыкава.

Сёння ў Палаце прадстаўнікоў праходзіць выстава работ навучэнцаў сярэдняй школы № 2 Магілёва «Творчасць, якая нясе мір». «Унікальнасць гэтай школы ў тым, што разам з агульнаадукацыйнымі прадметамі дзеці вывучаюць і прадметы мастацкага цыклу і разам з педагогамі дамагаюцца дастаткова высокіх вынікаў. Толькі за апошнія два гады іх працы былі ўдастоены 113 дыпломаў на міжнародных конкурсах. Цяперашняя выстава арганізавана ў межах рэспубліканскай акцыі «Нашы дзеці». Гэта вельмі светлая і добрая традыцыя, якая ўжо больш за чвэрць стагоддзя існуе ў нашай краіне і дзякуючы якой дзяўчынкі і хлопчыкі працягваюць верыць у цуды і дабро», – сказала Людміла Здорыкава.

Паводле яе слоў, сённяшні дзень запомніцца рабятам надоўга. Яны наведалі з экскурсіяй Палату прадстаўнікоў, пазнаёміліся з музейнай экспазіцыяй, прысвечанай гісторыі беларускага парламентарызму. Завяршэннем святочнага дня стала навагодняе прадстаўленне ў Прэзідэнцкай бібліятэцы і салодкія падарункі.

«Дэпутаты Палаты прадстаўнікоў штогод прымаюць удзел у акцыі «Нашы дзеці». Вядома, мы стараемся, каб кожнае дзіця было акружана клопатам і ўвагай. Асабіста мне нават складана адказаць на пытанне: каму гэта акцыя патрэбна больш: дзецям ці нам, дарослым? Акцыя дае нам магчымасць падзяліцца дабрынёй, шчодрасцю, цяплом, і, напэўна, для кожнага дарослага, які ўбачыў аднойчы шчаслівыя вочы дзіцяці, адмовіцца ад удзелу ў гэтай акцыі ўжо проста немагчыма, – дадала парламентарый. – Я вельмі рада, што да рэспубліканскай акцыі «Нашы дзеці» з кожным годам далучаецца ўсё больш удзельнікаў, каб падарыць дзецям свята і падзяліцца сваёй дабрынёй».

БЕЛТА