Дыялогавая пляцоўка па абмеркаванні праекта змяненняў і дапаўненняў у Канстытуцыю прайшла ў Шклоўскім раёне

У падтрымку рэспубліканскага рэферэндуму па ўнясенні змяненняў і дапаўненняў у Канстытуцыю Рэспублікі Беларусь у Александрыйскім фізкультурна-аздараўленчым комплексе прайшла дыялогавая пляцоўка.

На мерапрыемстве прысутнічалі дырэктар Інстытута сацыялогіі Нацыянальнай акадэміі навук, дацэнт Мікалай Мыслівец, старшыня Шклоўскага райвыканкама Андрэй Камко, дырэктар ААТ «Александрыйскае» Андрэй Кузьменка, першы сакратар Лагойскага раённага камітэта БРСМ, член маладзёжнага Парламента Рэспублікі Беларусь пры Мінскім абласным Савеце дэпутатаў Аджар Чэвік.

Заклікаючы прысутных да актыўных зносін, Мікалай Мыслівец завастрыў увагу на пытанні, чым была абумоўлена неабходнасць унясення змяненняў і дапаўненняў у дзеючы з 1994 года Асноўны Закон Рэспублікі Беларусь.

– Канстытуцыя была прынята ў той час, калі адбывалася станаўленне беларускай дзяржаўнасці, закладваліся асновы сацыяльна-эканамічнага падмурка суверэннай дзяржавы – сказаў Мікалай Мыслівец. – І вынікі замацаванай у Асноўным Законе стратэгіі развіцця дзяржавы вы сёння бачыце самі. Папраўкі ў Канстытуцыю, якія выносяцца на рэферэндум, не ўзятыя са столі. Мы прыйшлі да навацый у працэсе натуральнага развіцця грамадства. Знешняе асяроддзе ў цяперашні час дастаткова агрэсіўнае, трэба ўмець абараняць назапашаныя каштоўнасці, самім выбіраць кірунак развіцця. Некаторыя моманты ў дакуменце патрабуюць актуалізацыі, не трэба адносіцца да зменаў у Асноўны Закон як да надзвычайнай падзеі, гэта распаўсюджаная практыка ў многіх дзяржавах

На думку дырэктара Інстытута сацыялогіі НАН Беларусі, з праектам Канстытуцыі можа і павінен азнаёміцца кожны, каб прыйсці на рэферэндум з уласнай узважанай, аргументаванай высновай.

Пасля заканчэння дыялогавай пляцоўкі для яе ўдзельнікаў быў арганізаваны канцэрт з удзелам сталічных артыстаў, арганізатарам якога выступіла грамадскае аб’яднанне «Клуб вялікага спорту».

Прыемным сюрпрызам для жыхароў аграгарадка стала выступленне беларускага музыканта, спевака, артыста эстрады Уладзіміра Ухцінскага.

 mogilevnews.by