Дзмітрый Піневіч: у Магілёўскай абласной бальніцы даступныя ўсе тэхналогіі беларускай медыцыны

У Магілёўскай абласной клінічнай бальніцы даступныя ўсе тэхналогіі беларускай медыцыны. Такім меркаваннем з журналістамі падзяліўся міністр аховы здароўя Дзмітрый Піневіч падчас урачыстага мерапрыемства, прысвечанага 50-годдзю ўстановы аховы здароўя.

«Абласны клінічны цэнтр у Магілёве ствараўся 50 гадоў таму якраз пад высокія тэхналогіі і самы высокі ўзровень аказання медыцынскай дапамогі. Сюды прыязджаюць не проста па прынцыпе тэрытарыяльнасці – паступаюць самыя цяжкія пацыенты, якія маюць патрэбу ў кансультацыях, абследаваннях і лячэнні, – адзначыў Дзмітрый Піневіч. – Самы высокі ўзровень тэхналогій, якія ёсць у Беларусі, даступны ў гэтай абласной бальніцы. Ужо не вылічаецца дзясяткамі колькасць перасаджаных нырак. Трансплантацыя сэрца – гэта яшчэ больш высокі ўзровень. Гэта азначае, што кожнае структурнае падраздзяленне бальніцы аказвае якасную медыцынскую дапамогу».

Па словах міністра аховы здароўя, абласная клінічная бальніца адыгрывае важную ролю ў дадыпломнай і паслядыпломнай падрыхтоўцы спецыялістаў. «Для абласной бальніцы, клінічнага цэнтра важны кампанент – навучанне. І гэта этап паслядыпломнай падрыхтоўкі. Яшчэ раз падкрэслю: для бабруйскіх, для іншых прафесіяналаў, якія працуюць у Магілёўскім рэгіёне, гэта і цэнтр перападрыхтоўкі ў тым ліку. Таму, мяркую, галоўная задача – самім імкнуцца наперад і дапамагаць калегам з прыярытэтамі і вектарамі развіцця».

Дзмітрый Піневіч адзначыў і дасягненні Магілёўскай абласной клінічнай бальніцы за апошнія гады. «Згодна з даручэннем кіраўніка дзяржавы, было завершана будаўніцтва кардыяцэнтра, абноўлены цэлы шэраг іншых структурных падраздзяленняў, – сказаў міністр. – Мы даём ацэнку не толькі і не столькі сценам і абсталяванню, а таму калектыву, які прагне развіцця, прафесійнага росту і ў поўнай меры адпавядае самым высокім патрабаванням».

Як адзначыў галоўны ўрач Магілёўскай абласной клінічнай бальніцы Анатоль Кулік, усе сілы і сродкі медыкаў накіраваныя на тое, каб падоўжыць жыццё пацыентаў. «Тое, што зроблена за гэты месяц пасля ўвядзення новых карпусоў нашай бальніцы, паказала: з нашым абсталяваннем можам рабіць аперацыі найвышэйшага ўзроўню. Не так даўно правялі аперацыю па перасадцы сэрца, пачалі лячыць пацыентаў з парушэннем рытму. У нас ідзе канцэнтраванне кардыялагічнай дапамогі на месцы, – адзначыў ён. – Мы бачым ліст чакання, патрэбу ў сродках, каб аказваць дапамогу. Павінна працягнуцца наша супрацоўніцтва ўстановы з РНПЦ «Кардыялогія» і рэспубліканскім цэнтрам трансплантацыі. Бо любы прыпынак – крок назад».

Падчас урачыстага мерапрыемства, прысвечанага юбілею абласной клінічнай бальніцы, яе супрацоўнікі былі адзначаны высокімі ўзнагародамі. Знакам «Выдатнік аховы здароўя Рэспублікі Беларусь» узнагароджаны галоўная медыцынская сястра Аксана Малашэнка, загадчык цэнтра сардэчна-сасудзістай хірургіі Вадзім Левановіч, загадчык аддзялення гнойнай хірургіі Ігар Зіноўкін, урач ультрагукавой дыягностыкі аддзялення ультрагукавой дыягностыкі Алег Ананенка.

Усяго ўзнагароды атрымала больш за 200 работнікаў аховы здароўя. На ўрачыстай цырымоніі прысутнічаў Леанід Заяц, які з 2019 па снежань 2021 года быў старшынёй Магілёўскага аблвыканкама. Ён унёс вялікі ўклад у стварэнне кардыяцэнтра ў Магілёўскай абласной клінічнай бальніцы і развіццё сферы аховы здароўя ў рэгіёне.

Завершыцца святочнае мерапрыемства ў Палацы культуры вобласці вялікай канцэртнай праграмай.

БЕЛТА, фота Галіны Гаўрыловіч