06.08.2026 - 17:46

Атамная энергетыка – стратэгічны напрамак для Беларусі, які забяспечвае энергетычную бяспеку, эканамічны рост і тэхналагічны суверэнітэт. Запуск АЭС дазволіў знізіць залежнасць ад імпартнага газу на 14,5 млрд кубаметраў і зэканоміць больш за $600 млн бюджэтных сродкаў. Аб планах будаўніцтва трэцяга энергаблока на БелАЭС і другой АЭС у праграме «Эканамічнае асяроддзе» на тэлеканале «Беларусь 1» расказаў міністр энергетыкі Дзяніс Мароз.

Дзяніс Мароз паведаміў у эфіры:

– Ацаніўшы мультыплікатыўныя эфекты ад АЭС у эканоміцы, дзяржава мае намер развіваць гэты напрамак далей. Было прынятае фундаментальнае рашэнне: рэалізаваць трэці энергаблок на Беларускай АЭС і паралельна прапрацаваць будаўніцтва другой атамнай электрастанцыі.

Таксама Дзяніс Мароз растлумачыў адрозненні паміж двума праектамі. Паводле яго слоў, рашэнне па другім энергаблоку – гэта фактычна кропкавае пашырэнне ўжо існуючай станцыі, тады як новая АЭС патрабуе значна больш працяглай падрыхтоўкі. Міністр энергетыкі адзначыў:

– Рэалізацыя трэцяга энергаблока – гэта зразумелыя ўмовы, правераныя патрабаванні, па сутнасці, копія існуючых блокаў. Тэрміны будаўніцтва – кароткія. Што да другой АЭС — гэта ўжо новы праект, новая пляцоўка, новыя працэдуры. Тут тэрміны рэалізацыі перамяшчаюцца за 2040 год. Але рашэнне аб будаўніцтве трэба прымаць ужо зараз, таму што энергетыка – гэта не тая галіна, якая жыве рэагаваннем на сённяшнія праблемы. Яна накіравана на ўстараненне складанасцей, якія будуць узнікаць праз 10–15 гадоў.

Цяпер актыўна ідзе абмеркаванне пляцоўкі для будаўніцтва другой АЭС. Па геалагічных умовах арыентыровачна разглядаецца Магілёўская вобласць.

 СБ