19.02.2026 - 14:30

Намеснік старшыні Магілёўскага абласнога выканаўчага камітэта Алена Пруднікава-Кірпічонак 18 лютага правяла сустрэчу з дэлегацыяй Пасольства Рэспублікі Узбекістан у Рэспубліцы Беларусь.


Яна адзначыла, што развіццю ўзаемавыгадных двухбаковых сувязей з Рэспублікай Узбекістан удзяляецца асаблівая ўвага. Так, у рамках пагадненняў аб супрацоўніцтве найбольш актыўна падтрымліваюцца міжрэгіянальныя адносіны паміж Магілёўскай вобласцю і Андыжанскай і Джызацкай абласцямі. Ёсць зацікаўленасць у іх далейшым паглыбленні. Цяпер дзелавыя колы Андыжанскай вобласці праводзяць сустрэчы і перагаворы з Магілёўскімі арганізацыямі і рэзідэнтамі СЭЗ «Магілёў». У сферы знешняга гандлю паміж Магілёўскай вобласцю і Рэспублікай Узбекістан адзначаецца станоўчая дынаміка.


«Мінулы год ахарактарызаваўся тым, што беларуска-ўзбекскія адносіны апынуліся на піку. Пачынаючы з 2021 года мы ў знешнегандлёвым абароце прыраслі ў 2,6 раза і на сёння маем $35,2 млн. Але на гэтым мы не збіраемся спыняцца і, як ужо абмеркавалі на сустрэчы, працуем над задачамі, якія паставіў наш кіраўнік дзяржавы. У іх ліку - амбіцыйная задача да 2030 года нарасціць гандлёвы абарот да $2 млрд. Таму ёсць цікавасць і беларускага боку, роўна як і цікавасць узбекскага боку да нас, і да нашых вытворцаў, і да нашага турыстычнага патэнцыялу. Таму будзем рухацца наперад, павялічваць экспарт тавараў і экспарт паслуг», - пазначыла Алена Пруднікава-Кірпічонак.

Яна расказала, што ва Узбекістан з рэгіёну экспартуецца шырокі спектр прадукцыі: лесаматэрыялы і прадукцыя дрэваапрацоўкі, малочная прадукцыя, ялавічына, мяса і субпрадукты свойскай птушкі, папера і кардон, гатовыя трыкатажныя вырабы. Магілёўскія прадпрыемствы закупляюць ва Узбекістане пражу, трыкатажныя вырабы, пасцельную і сталовую бялізну, традыцыйныя вінаград і садавіну.

Паспяховым прыкладам супрацоўніцтва з'яўляецца рэалізацыя маштабнага інвестыцыйнага праекта па стварэнню ў Ташкенцкай вобласці аграпрамысловага комплексу па вытворчасці мяса птушкі і камбікармоў групай кампаній «Сервалюкс». У кастрычніку 2025 года «Сервалюксам» ужо адкрыты ў Ташкенце першы магазін фірменнага гандлю з асартыментам прадукцыі з мяса птушкі пад брэндам JO'JA.


Як адзначыў саветнік па палітычных пытаннях Пасольства Рэспублікі Узбекістан у Рэспубліцы Беларусь Азімжон Азотаў, на запыт па развіццю супрацоўніцтва яны атрымалі запрашэнне ад Магілёўскага аблвыканкама паўдзельнічаць у сумесным дзелавым форуме «Узбекістан-Магілёў»: бізнес-дыялог узбекскіх прадпрымальнікаў, рэзідэнтаў і адміністратараў. У мерапрыемстве прынялі ўдзел Надзвычайны і Паўнамоцны Пасол Рэспублікі Узбекістан у Рэспубліцы Беларусь Рахматула Назараў, дэлегацыя Андыжанскай вобласці на чале з намеснікам губернатара рэгіёну Ільхамам Сабіравым, прадстаўнікі бізнес-супольнасці.

«Сённяшняя сустрэча з кіраўніцтвам абласнога выканкама таксама дае нам падставу спадзявацца, што далейшае супрацоўніцтва будзе эфектыўна развівацца, – падкрэсліў Азімжон Азотаў. – У шматпланавым фармаце мы знаходзім сумесныя кропкі судотыку для далейшага росту ў розных напрамках, у тым ліку і зусім новых.Гэта тычыцца і прамысловай вытворчасці, і гандлёва-эканамічных сувязяў, і культурна-гуманітарнага супрацоўніцтва.


Магілёўская вобласць супрацоўнічае з некалькімі рэгіёнамі Узбекістана. Прыемна адзначыць, што гэтае супрацоўніцтва развіваецца. І мы са свайго боку таксама гатовы аказваць падтрымку ў развіцці гэтага рознабаковага ўзаемадзеяння. Думаем, што сёлета нам удасца правесці чарговы міжрэгіянальны ўзбекска-беларускі форум і пашырыць супрацоўніцтва. Ужо не канкрэтна паміж некалькімі абласцямі, але і ўсіх абласцей з усімі. Практыка паказвае, што паміж абласцямі развіваецца добрае ўзаемадзеянне, гандаль, прамысловая кааперацыя, якія не дазваляюць абмяжоўвацца адным-двума партнёрамі. З'яўляецца патрэбнасць у развіцці, супрацоўніцтве з усімі партнёрамі, з усімі магчымымі бакамі і прадпрыемствамі.

У Магілёўскай вобласці ў нас вельмі добрыя перспектывы ў сферы прамысловай кааперацыі, таксама ў галіне сельскагаспадарчай тэхнікі і мясамалочнай прамысловасці. Узаемадзеянні ў такіх новых напрамках, як будаўнічая галіна, гэта значыць, удзел прадпрыемстваў Магілёўскай вобласці ў будаўнічых праектах Узбекістана.».

Юлия Таранава, фота Галіны Гаўрыловіч