ПереводчикСЭЗ «Магілёў» і Дзелавое аб'яднанне кластараў Расіі будуць развіваць супрацоўніцтва
СЭЗ «Магілёў» і Дзелавое аб'яднанне кластараў Расіі будуць развіваць супрацоўніцтва, распавялі ў адміністрацыі свабоднай эканамічнай зоны «Магілёў».
Першы крок на шляху ўмацавання ўзаемадзеяння – падпісанне пагаднення аб супрацоўніцтве, якое адбылося на палях II Міжнароднай прамысловай выставы «ІННАПРОМ. Беларусь». Свае подпісы на дакументах паставілі кіраўнік адміністрацыі СЭЗ «Магілёў» Павел Марыненка і старшыня праўлення Дзелавога аб'яднання кластараў Расіі Сяргей Маёраў.
У якасці прыярытэтных напрамкаў супрацоўніцтва выдзелілі абмен камерцыйнай, тэхнічнай і іншай інфармацыяй, арганізацыю сумесных мерапрыемстваў, накіраваных на ўмацаванне эканомікі дзвюх краін. Акрамя таго, плануецца праводзіць сумесны аналіз рынку і работу па прыцягненню інвестараў – як на тэрыторыю Магілёўскай вобласці, так і ў рэгіёны Расіі.
«Гэта для нас важны і цікавы праект, бо нашыя калегі з Расійскай Федэрацыі маюць сфармаваную структуру кластарнага ўзаемадзеяння паміж прадпрыемствамі. І мы зможам разам з імі аналізаваць рынкі, разам думаць аб прыцягненні інвестараў на агульны рынак заказаў, дакладна разумець і забяспечваць прамы доступ рэзідэнтаў СЭЗ «Магілёў» да галоўных інжынераў, тэхнолагаў найбуйнейшых расійскіх кампаній, – падкрэсліў Павел Марыненка. – У адпаведнасці з гэтым мы зможам разам знаходзіць той аб'ём рынку, які неабходны для прыцягнення інвестара, і фармаваць эканамічна прывабную мадэль, каб інвестар прыняў рашэнне і размясціў сваю вытворчасць у Магілёўскай вобласці».
У міжнароднай выставе ў Мінску прымаюць удзел дзевяць рэзідэнтаў свабоднай эканамічнай зоны «Магілёў». Новыя кантакты і дамоўленасці, якія будуць дасягнуты ў час работы выставы стануць дадатковым стымулам для далейшага развіцця СЭЗ «Магілёў» і прадпрыемстваў–рэзідэнтаў.