У Магілёўскай вобласці абмеркавалі інавацыйныя падыходы ў будаўніцтве і ЖКГ

Семінар–практыкум «Інавацыйныя падыходы ў будаўніцтве» для кадравага рэзерву аблвыканкама ў сферы будаўніцтва і ЖКГ, а таксама студэнтаў БРУ і архітэктурна–будаўнічага каледжа прайшоў сёння ў Магілёве. У працы семінара–практыкума, прысвечанага актуальным пытанням будаўнічай галіны і жыллёва–камунальнай гаспадаркі, прынялі ўдзел намеснік старшыні Магаблвыканкама Ігар Клішо, намеснік старшыні камітэта па архітэктуры і будаўніцтве аблвыканкама Уладзімір Ігнатаў, генеральны дырэктар Дзяржаўнага аб'яднання «Жыллёва–камунальная гаспадарка Магілёўскай вобласці» Таццяна Ціханоўская.

Мэтай семінара, які прайшоў на базе ААТ «Інстытут «Магілёўграмадзянпраект», стала ўдасканаленне ведаў у галіне будаўнічай дзейнасці, кіраўнічых кампетэнцый, а таксама этыка–дзелавых адносін у калектыве.

Адкрываючы семінар, Ігар Клішо звярнуўся да прысутных з прывітальным словам, у якім адзначыў важнасць комплекснага падыходу да падрыхтоўкі спецыялістаў.

Тэма нашага семінара даволі цікавая і інавацыйная. Першая частка будзе тэарэтычнай, а другая – практычнай. Мы вывучым нашу вытворчасць панэляў, тыя ноу–хау, якія з'явіліся ў свой час у нашай вобласці і былі адаптаваны беларускімі будаўнікамі. Зразумела, што выпускнікі ВНУ працуюць і ў будаўніцтве, і ў эксплуатацыі. Адны будуюць, другім трэба будзе эксплуатаваць. Усім неабходна валодаць пэўнымі навыкамі. Таксама мы закранем пытанні псіхалогіі зносін у калектыве і прафілактыкі эмацыйнага выгарання. Жадаю ўсім працаваць, не саромецца, задаваць пытанні. Мы будзем рады адказаць», – падкрэсліў ён.

У ходзе тэарэтычнай часткі з дакладамі выступілі прадстаўнікі профільных камітэтаў, упраўленняў аблвыканкама і ВНУ, арганізацый сферы ЖКГ і будаўніцтва. Удзельнікі разгледзелі стан і перспектывы развіцця будаўнічага комплексу і жыллёва–камунальнай гаспадаркі Магілёўскай вобласці. Асобная ўвага была ўдзелена міжнароднаму вопыту ў будаўніцтве, а таксама пытанням укаранення «VST–тэхналогій». Акрамя таго, прысутныя абмеркавалі тэндэнцыі развіцця галіны ЖКГ і пытанні добраўпарадкавання горада.

Значны блок праграмы быў прысвечаны сацыяльна–псіхалагічным аспектам прафесійнай дзейнасці. Спецыялісты–псіхолагі расказалі ўдзельнікам аб псіхалогіі этыка–дзелавых адносін у працоўным калектыве і метадах прафілактыкі эмацыйнага выгарання, што асабліва актуальна для работнікаў сферы будаўніцтва і ЖКГ.

Практычная частка семінара працягнулася на вытворчай базе філіяла «Упраўленне вытворча–тэхналагічнай камплектацыі» ААТ «Будаўнічы трэст № 17 ордэна Працоўнага Чырвонага Сцяга». Удзельнікі азнаёміліся з вытворчымі працэсамі, сучаснымі тэхналогіямі і напрацоўкамі прадпрыемства.

Завяршылася мерапрыемства падвядзеннем вынікаў. Удзельнікі адзначылі практычную каштоўнасць семінара, магчымасць абмену вопытам і атрымання актуальных ведаў, неабходных для далейшай эфектыўнай работы ў сферы будаўніцтва і жыллёва–камунальнай гаспадаркі рэгіёна.

Юлія Таранава, фота Галіны Гаўрыловіч