10.03.2026 - 16:21

Вытворчасць новых відаў прадукцыі, тэхнічнае пераўзбраенне – у Магілёўскай вобласці 34 інвестпраекты ўвайшлі ў пералік праграмы «Рэгіянальная ініцыятыва».

Каб трапіць у праграму, праект павінен быць значным для сацыяльна–эканамічнага развіцця рэгіёну з улікам галіновых асаблівасцей, забяспечваць стварэнне новых вытворчасцей або мадэрнізацыю існуючых.

Інструментам фінансавання інвестпраектаў выступае прадукт «Моцныя рэгіёны». Усяго ў спісе 185 праектаў па ўсёй краіне.

Размова ідзе аб прадпрыемствах рознай формы ўласнасці. Некаторыя арганізацыі запланавалі рэалізацыю адразу некалькіх інвестпраектаў у рамках «Рэгіянальнай ініцыятывы». Так, ААТ «Дамачай» плануе мадэрнізацыю ўчастка па выпуску дробнаштучных булачных вырабаў Бабруйскага філіяла і тэхнічнага пераўзбраення вытворчасці Крычаўскага філіяла. Дарэчы, вытворчасць прадуктаў харчавання – трэнд сярод інвестараў. ААТ «Бабулін гладыш» – кіруючая кампанія холдынгу «Магілёўская малочная кампанія «Бабулін гладыш» плануе набыццё абсталявання для нарэзкі і ўпакоўкі сыроў для Мсціслаўскага філіяла. Рэканструкцыя і будаўніцтва комплексу будынкаў і збудаванняў на тэрыторыі ААТ «Малочныя горкі» прадугледжвае перапрацоўку малака і вытворчасць сыроў. Праект ТАА «Клімавіцкі малочны камбінат» прадугледжвае арганізацыю вытворчасці сухіх малочных прадуктаў. Стварэнне вытворчасці мяса, мясных паўфабрыкатаў і мясных кансерваў запланавала Магілёўскае райспажыўтаварыства, а Клічаўскае — новая вытворчасць прадуктаў харчавання. Замена абсталявання па забою і перапрацоўцы птушкі чакаецца ў ААТ «Александрыйскае», а перапрацоўка і кансерваванне рыбы, ракападобных і малюскаў – у ААТ «Фарэлевая гаспадарка «Лохва».

Яшчэ адзін папулярны напрамак інвестпраектаў – вытворчасць будматэрыялаў. Так, ААТ «Дартс плэй» у Касцюковічах будзе вырабляць дахавую ТПО–мембрану. Стварэнне ўчастка вытворчасці пенапалістырольных пліт арганізуе СТАА «Завод ліцейнай вытворчасці». Вытворчасць цеплаізаляцыі з успененых эластамераў – праект ТАА «Кампанія ТИЗ–М» з Глуска. Рэканструкцыя будынка фармовачнага цэха пад вытворчасць будаўнічых матэрыялаў запланавана ААТ «Чавускі завод жалезабетонных вырабаў». Вытворчасцю тратуарнай пліткі, бартавога каменя, блокаў падмуркавых, бетону таварнага зоймецца Дрыбінская СПМК №1.

Шэраг буйных прадпрыемстваў нацэлены рэалізаваць праекты па мадэрнізацыі. Тэхнічнае пераўзбраенне з павелічэннем вытворчых магутнасцей механічнага ўчастка – у планах у ААТ «Бабруйсксельмаш». Мадэрнізацыю ўчастка правядзе ЗАТ «Бабруйскмэбля». Тэхнічная мадэрнізацыя цэха шклотары №2 намечана ў Ялізава Асіповіцкага раёна. Павелічэнне вытворчых магутнасцей з мэтай захавання тэхналагічнага суверэнітэту вытворчасці пасажырскай і аўтамабільнай тэхнікі ў Рэспубліцы Беларусь – праект Асіповіцкага завода аўтамабільных агрэгатаў. Рэканструкцыю сістэмы падачы цэменту з пераводам на механізаваную на першай тэхналагічнай лініі па вытворчасці цэменту ў якасці інвестпраекта заявіла ААТ «Беларускі цэментны завод» у горадзе Касцюковічы.

 СБ