10.04.2026 - 14:08

У Магілёўскай вобласці працягваецца актыўная работа па аказанні фінансавай дапамогі суб'ектам гаспадарання ў рамках рэалізацыі Дзяржаўнай праграмы «Устойлівае прадпрымальніцтва». Аб прамежкавых выніках і механізмах падтрымкі паведаміла начальнік аддзела прадпрымальніцтва камітэта эканомікі Магілёўскага аблвыканкама Наталля Рэчыцкая.

Паводле слоў эксперта, дзяржаўная дапамога прадастаўляецца прадпрыемствам для рэалізацыі значных інвестыцыйных праектаў. Асноўнымі інструментамі тут выступаюць субсідыі на кампенсацыю часткі працэнтаў па банкаўскіх крэдытах, а таксама прадастаўленне льготных крэдытаў за кошт сродкаў абласнога бюджэту.

— За 2021–2025 гады фінансавую падтрымку атрымалі 43 інвестыцыйныя праекты. Агульная сума выдзеленых сродкаў склала 9,9 мільёна рублёў. Гэтыя рэсурсы дазволілі бізнэсу істотна абнавіць матэрыяльна–тэхнічную базу. Ва ўласнасць прадпрыемстваў перайшлі восем капітальных пабудоў, закуплены 44 адзінкі транспартных сродкаў і спецтэхнікі, а таксама больш за 50 адзінак прамысловага абсталявання, — адзначыла Наталля Рэчыцкая.

Субяседніца падкрэсліла шырокую геаграфію і галіновую дыверсіфікацыю атрымальнікаў дзяржпадтрымкі. Заяўкі паступалі не толькі ад прадпрыемстваў Магілёва і Бабруйска, але і ад прадстаўнікоў Быхаўскага, Гарэцкага, Кіраўскага, Касцюковіцкага, Магілёўскага, Чавускага і Шклоўскага раёнаў.

Спектр дзейнасці арганізацый ахоплівае ключавыя сектары эканомікі – ад сельскай гаспадаркі і харчовай прамысловасці да дрэваапрацоўкі, гарбарнай вытворчасці, медыцыны і транспартных паслуг. Сістэмная работа ў гэтым напрамку дае магчымасць забяспечваць устойлівае развіццё прыватнага сектара і ўмацоўваць эканамічны патэнцыял Магілёўскай вобласці.

СБ