14.04.2026 - 10:30

Інвестыцыі ў рэцыклінг

Нягледзячы на ​​тое, што ў складзе ААТ «Гродзенскі шклозавод» пляцоўка ў Ялізава не так даўно, яна дэманструе ўстойлівасць вытворчай мадэлі. Да свайго васьмігоддзя ў новым статусе філіял «Ялізава» падышоў з дыверсіфікаванай структурай даходаў і ўстойлівым ростам прамысловай вытворчасці, застаючыся падмуркам шкляной галіны краіны.

Шклозавод паспяхова трансфармаваў гістарычную спадчыну ў сучасны высокатэхналагічны кластар. Спалучэнне маштабных інвестыцый у экалагічныя праекты і планамерная падрыхтоўка да новага этапа мадэрнізацыі ствараюць трывалы задзел для стабільнай работы ў бліжэйшым дзесяцігоддзі. Прадпрыемства не проста вырабляе ўпакоўку – яно фарміруе новыя стандарты адказнай і эфектыўнай вытворчасці ў рэгіёне.


Ключавы індыкатар

Летась прадпрыемства вырабіла прамысловай прадукцыі ў дзейных цэнах на суму 93,7 мільёна рублёў. Тэмп росту аб'ёмаў вытворчасці склаў 112,6 працэнта да ўзроўню 2024–га, што сведчыць аб высокай ступені загрузкі магутнасцей і эфектыўнасці сістэмы кіравання збытам.

Асноўным вектарам дзейнасці застаецца выпуск шкляной тары – слоікаў і бутэлек для патрэб харчовай прамысловасці.

Філіял працягвае актыўна развіваць экспартны напрамак, адаптуючыся да зменлівай кан'юнктуры знешніх рынкаў. Пастаўкі на знешнія рынкі займаюць каля 27 працэнтаў у агульным аб'ёме выпушчанай прадукцыі. За 2025 год валютная выручка склала 8,2 мільёна долараў.

Такія суадносіны дазваляюць прадпрыемству захоўваць баланс паміж забеспячэннем патрэбнасцей унутранага рынку і атрыманнем валютных паступленняў для мадэрнізацыі вытворчасці.

Стратэгічнае планаванне

За сухімі лічбамі вытворчых справаздач заўсёды стаіць выразная кіраўнічая філасофія. Аб прыярытэтах развіцця і ўнутранай культуры прадпрыемства расказаў дырэктар філіяла «Ялізава» Рыгор Фуркаль:

– Высокіх вынікаў немагчыма дасягнуць без трох базавых элементаў: жорсткай дысцыпліны, культуры вытворчасці і персанальнай адказнасці кожнага супрацоўніка. Прычым не толькі за свой пэўны ўчастак, але і за лёс прадпрыемства ў цэлым. Толькі пры зладжанай і мэтанакіраванай рабоце ўсяго калектыву мы атрымліваем прадукт высокай якасці. Лепшым пацвярджэннем гэтай эфектыўнасці з'яўляецца штогадовае паспяховае праходжанне аўдытаў на адпаведнасць самым строгім міжнародным стандартам бяспекі харчовай прадукцыі.

Стратэгія прадпрыемства празрыстая, падкрэслівае кіраўнік. Пералічвае:

– Гэта пастаянная мадэрнізацыя, укараненне перадавога вопыту, асваенне новых відаў вырабаў, пошук рынкаў і стварэнне камфортных умоў для працы. Актыўна прыцягваем моладзь і павышаем кваліфікацыю кадраў, разумеючы, што за імі – будучыня завода.

Прыбытак з кожнага шкельца

На заводзе ўпэўнены, што інвестыцыі ў мадэрнізацыю – стратэгія эфектыўнасці і тэхналагічнага суверэнітэту. Устойлівы рост паказчыкаў філіяла «Ялізава» стаў магчымы дзякуючы бескампраміснай палітыцы тэхнічнага пераўзбраення.

За 2018—2025 гады прадпрыемства рэалізавала шэраг капіталаёмістых праектаў, кіруючыся прынцыпам максімальнай аддачы ад кожнага ўкладзенага рубля. Сумарны аб'ём інвестыцый пацвярджае, што абнаўленне фондаў з'яўляецца для завода безумоўным прыярытэтам.

Ключавым этапам мадэрнізацыі стала абнаўленне вытворчых магутнасцей. У прыватнасці, была праведзена мадэрнізацыя лініі шкловарнай печы нумар 2 і рэалізаваны маштабны праект у цэху шклотары нумар 4. Апошні ўключаў у сябе поўную рэканструкцыю шкловарнай печы і замену тэхналагічнага абсталявання.

Завод планамерна асвойвае перадавыя сусветныя стандарты, укараняючы сучасныя метады вытворчасці. Дзякуючы набыццю спецыялізаванага абсталявання і дадатковых опцый для інспекцыйнага абсталявання метад NNPB (сучасная тэхналогія вытворчасці шкляных бутэлек) быў паспяхова ўкаранёны спачатку на адной лініі, а да цяперашняга моманту – на ўсіх чатырох. Гэта дазволіла наладзіць выпуск аблегчанай тары, якая, валодаючы меншай вагай пры нязменнай трываласці, карыстаецца падвышаным попытам як на ўнутраным рынку, так і ў Расіі.

Асаблівае месца ў інвестыцыйным партфелі філіяла «Ялізава» займае праект па стварэнню вытворчага ўчастка па перапрацоўцы і сартаванні шклабою, паспяхова завершаны ў 2024–м. Ініцыятыва, уключаная ў маштабны пералік «Адзін раён – адзін праект», стала адказам на сучасныя выклікі рэсурсазберажэння.

Аб'ём інвестыцый склаў 15,8 мільёна рублёў, што дазволіла замкнуць цыкл перапрацоўкі другаснай сыравіны. А гэта зніжэнне энергазатрат пры варэнні шкломасы і мінімізацыя экалагічнай нагрузкі.

Участак, які працуе ў кругласутачным рэжыме, валодае праектнай магутнасцю 50 тысяч тон за год. Дынаміка загрузкі дэманструе ўпэўнены рост. У першыя паўгода пасля запуску перапрацавана без малога 14 тон сыравіны пры загрузцы 54,8 працэнта. Па выніках 2025–га аб'ём перапрацоўкі змешанага шклабою дасягнуў 39,5 тоны.

– Запуск лініі даў магчымасць ААТ «Гродзенскі шклозавод» радыкальна знізіць залежнасць ад знешніх пастаўшчыкоў сыравіны. Тэхналагічны працэс дазваляе атрымліваць вычышчаны бясколерны і зялёны шклабой для ўласных патрэб, а карычневы – накіроўваць на рэалізацыю іншым спажыўцам, – удакладніў Рыгор Сяргеевіч.

Эканамічны эфект ад выкарыстання ўласнага сартаванага шклабою выявіўся ў зніжэнні сабекошту гатовай прадукцыі больш як на 2 працэнты. Пры гэтым фактычны сабекошт перапрацоўкі ў мінулым годзе склаў 244,38 рубля за тону.

Дарэчы, прадпрыемства таксама выступае ключавым звяном у сістэме збору другасных матэрыяльных рэсурсаў краіны. За 2025–й філіялам «Ялізава» сабрана 44,7 тоны шклабою, з якіх пераважная частка прыйшлася на выкананне дзяржаўнай замовы. У цэлым па юрыдычнай асобе аб'ём збору за 12 месяцаў мінулага года – 54 546 тон, што пацвярджае лідзіруючыя пазіцыі ААТ «Гродзенскі шклозавод» у сферы экалагічнага менеджменту.

Такім чынам, філіял «Ялізава» трансфармаваўся ў сучасны прамысловы кластар, дзе інавацыі ў галіне перапрацоўкі адходаў становяцца падмуркам для зніжэння выдаткаў і павышэння маржынальнасць канчатковага прадукту.

Сацыяльны капітал і роля ў рэгіёне

Апроч экалагічнага аспекту (рэцыклінг спрыяе захаванню прыродных рэсурсаў), праект нясе значную сацыяльную нагрузку. Для сельскай мясцовасці філіял «Ялізава» застаецца не проста прамысловым аб'ектам, а сістэмаўтваральным цэнтрам занятасці і сацыяльных гарантый. Дзякуючы пашырэнню вытворчасці было створана 27 новых працоўных месцаў, што крытычна важна для рэгіянальнага рынку працы.

– Стварэнне камфортных і бяспечных умоў працы ідзе ў нагу з асноўнай вытворчасцю. Інвестыцыі ў інфраструктуру – ад мадэрнізацыі сталярнай майстэрні да абнаўлення грузападымальнага абсталявання ў цэхах – напрамую ўплываюць на культуру вытворчасці і лаяльнасць калектыву. Мадэрнізацыя – гэта не толькі замена станкоў на больш прадукцыйныя, але і забеспячэнне працоўных месцаў, якія адпавядаюць высокім стандартам XXI стагоддзя, – адзначыў Рыгор Фуркаль.

Погляд у будучыню

Дасягнутымі вынікамі «Ялізава» не абмяжоўваецца. Наступная амбіцыйная мэта – маштабная тэхнічная мадэрнізацыя цэха шклотары № 2, запланаваная на 2026–2027 гады.

Рашэнне аб рэнавацыі прадыктавана вытворчай логікай, бо дзейная шкловараная печ цэха выпрацавала праектны рэсурс. Далейшая эксплуатацыя прывяла б да неапраўданага росту расходу прыроднага газу і рызыкі пазапланавых прыпынкаў.

Новы інвестыцыйны праект коштам 34 мільёны рублёў накіраваны на вырашэнне некалькіх ключавых задач. Гаворка пра даўгавечнасць, надзейнасць, энергаэфектыўнасць. Таксама ён дасць пашырэнне асартыментнай матрыцы і магчымасць аператыўнага манеўравання паміж лініямі пры выкананні заказаў.

Прычым прадугледжаная мадэрнізацыя выходзіць за рамкі інтарэсаў аднаго завода. Чакаецца, што рэалізацыя праекта акажа значны ўплыў на рынак упакоўкі і эканоміку рэгіёну ў цэлым. Нарошчванне магутнасцей дасць магчымасць скараціць закупкі тары за мяжой і адначасова ўзмацніць экспартную экспансію.

СБ