Экспедыцыі абласнога гісторыка-патрыятычнага клуба «Віккру» на працягу 2020 года будуць працаваць у Бабруйскім раёне

Пошукавыя экспедыцыі абласнога гісторыка-патрыятычнага клуба «Віккру» на працягу года будуць працаваць на тэрыторыі Бабруйскага раёна.

Як паведамілі ў Бабруйскім райвыканкаме, у лютым-снежні 2020 года «Віккру» запланаваў правесці пошукавыя экспедыцыі (вахты памяці) па зборы інфармацыі аб невядомых воінскіх пахаваннях абаронцаў Айчыны, патанулай бранятэхніцы, збітых савецкіх самалётах і зніклых без вестак экіпажах у гады Вялікай Айчыннай вайны ў 1941–1944 гадах.

Пошукавікі правядуць таксама праверку архіўнай інфармацыі, сустрэчы з мясцовымі старажыламі, запішуць іх успаміны, зробяць фотафіксацыю пошукавых аб’ектаў. На аснове атрыманай інфармацыі будуць складзены інфармацыйныя лісты для правядзення палявых пошукавых работ на месцах меркаваных невядомых пахаванняў воінаў Чырвонай Арміі сумесна з 52-м асобным спецыялізаваным пошукавым батальёнам Узброеных Сіл Беларусі.

mogilevnews.by