Фільмы Манхэтэнскага фестывалю кароткаметражнага кіно пакажуць 23–26 верасня ў Магілёве

Фільмы Манхэтэнскага фестывалю кароткаметражнага кіно пакажуць у магілёўскім кінатэатры «Радзіма». Пра гэта паведамілі ў Магілёўскім дзяржаўным прадпрыемстве «Кінавідэапракат».

«Манхэтэнскі фестываль –адзін з найбуйнейшых форумаў кароткаметражнага кіно ў свеце. Сёлета ён пройдзе ў кінатэатрах і на арт-пляцоўках 400 гарадоў свету 5 кантынентаў, – расказалі суразмоўцы. – Далучыцца да шматмільённай аўдыторыі гледачоў аматараў кіно і прагаласаваць за ўпадабаную стужку ёсць магчымасць і ў магілёўцаў».

Праграма паказаў у нашым горадзе ўключае 10 фільмаў на мове арыгіналу, якія будуць суправаджацца рускімі субтытрамі. Гэта кароткія кінагісторыі з ЗША, Вялікабрытаніі, Афганістана, Паўночнай Ірландыі, Францыі, Нарвегіі, Італіі і Канады.

«Створаныя ў розных кутках планеты, фільмы нязменна здзіўляюць і дазваляюць падарожнічаць вакол свету, сустракаць самых розных людзей, пазнаваць неверагодныя гісторыі і перажываць моцныя эмоцыі, – адзначылі ў «Кінавідэапракаце». – Як адправіць нуднага банкіра па золата ў міфічны Эльдарада? Як не сысці з розуму ў цэнтры Нью-Ёрка 21 стагоддзя падчас сусветнай эпідэміі? Як атрымаць неверагодную выгаду ад сваёй дзіўнай «хваробы»? Як выжыць, калі ў цябе няма ніякіх правоў? Як выстаяць перад тварам смерці дзеля адданага сябра? І многае іншае, з чаго складаецца наша жыццё. Прыходзьце, глядзіце і галасуйце за найлепшы кароткаметражны фільм Manhattan Short».

Працягласць праграмы –2 ч. 25 мін. Узроставае абмежаванне – 16+. Расклад сеансаў глядзіце на сайце Магілёўскага дзяржаўнага прадпрыемства «Кінавідэапракат».

Ред.