24.12.2019 - 14:41

Фінальныя мерапрыемствы дабрачыннай акцыі «Цуды на Раство» пройдуць у Магілёўскай вобласці 26–27 снежня. Пра гэта паведамілі ў абласным камітэце ГА «БРСМ».

Як расказалі суразмоўцы, у ААТ «Універмаг “Цэнтральны”» Магілёва працавала своеасаблівая «Ёлка жаданняў». На зялёнай прыгажуні валанцёры руху ГА «БРСМ» «Добрае сэрца» ўвечары развешвалі паштоўкі з запаветнымі марамі дзяцей. Пад ёй была ўстаноўлена скрынка «Добрых сэрцаў», куды любы жадаючы мог пакласці навагодні падарунак: ад дзіцячага канструктара да мяккай цацкі.

26 снежня ў 12.00 на базе Круглянскага цэнтра карэкцыйна-развіваючага навучання і рэабілітацыі (вул. Жуніна, д. 7А) пройдзе навагодняя забаўляльная праграма з удзелам Дзеда Мароза і Снягуркі з уручэннем дзецям падарункаў, сабраных падчас акцыі. А 27 снежня ў 11.00 віншаванні чакаюць выхаванцаў дзіцячага сацыяльнага прытулку ДУА «Сацыяльна-педагагічны цэнтр Магілёўскага раёна» (в. Зарэсце, вул. Лясная, 2).

Акрамя гэтага, саюзная моладзь павіншуе з Новым годам шматдзетную сям’ю Ціханавых са Слаўгарада.

Дзякуючы акцыі «Цуды на Каляды», валанцёры БРСМ дапамогуць выканаць навагоднія жаданні больш за 50 дзяцей, – расказалі суразмоўцы.

Дабрачынная акцыя «Цуды на Каляды» з’яўляецца рэспубліканскай. Нязменныя арганізатары праекта – БРСМ і Беларуская рэспубліканская піянерская арганізацыя. Сімвалам акцыі з’яўляецца чырвоная рукавічка, а своеасаблівай візітоўкай – «Ёлка жаданняў».

Святочныя дабрачынныя праграмы акцыі праходзілі ва ўсіх раёнах Магілёўшчыны. Валанцёры БРСМ і цімураўцы БРПА арганізоўвалі конкурсы, святочныя праграмы, адрасныя віншаванні для выхаванцаў дзіцячых дамоў, школ-інтэрнатаў, прыёмнікаў-размеркавальнікаў, прытулкаў для дзяцей-сірот, дзяцей-інвалідаў, дзяцей з абмежаванымі магчымасцямі, дзяцей, якія знаходзяцца ў рэабілітацыйных цэнтрах, бальніцах. Акрамя таго, акцыя ўключала збор спартыўнага інвентара, канцылярскіх тавараў, прадметаў для мастацкай творчасці, настольных гульняў, цацак, кніг для дзіцячых сацыяльных устаноў.