05.06.2026 - 09:29

Больш за 68 тыс. абітурыентаў плануюць прыняць у каледжы Беларусі сёлета. Аб гэтым расказала намеснік начальніка галоўнага ўпраўлення прафесійнай адукацыі – начальнік упраўлення прафесійна–тэхнічнай і сярэдняй спецыяльнай адукацыі Міністэрства адукацыі Аляксандра Пятрова ў праекце БЕЛТА «Краіна гаворыць».

У Рэспубліцы Беларусь дзейнічае адзіны від устаноў адукацыі. І на ўзровень прафесійна–тэхнічнай, і на ўзровень сярэдняй спецыяльнай адукацыі абітурыентаў прымаюць каледжы, а таксама шэраг іншых устаноў адукацыі, такія як філіялы ВНУ і вучэбна–педагагічныя комплексы, да якіх адносяцца гімназіі, каледжы мастацтваў і вучылішча Алімпійскага рэзерву.

«Традыцыйна ў нас на два ўзроўні (ПТА і ССА) прыём больш за 68 тыс. На ўзровень прафесійна–тэхнічнай адукацыі мы плануем прыняць 29 тыс. чалавек на бюджэт. На ўзровень сярэдняй спецыяльнай адукацыі – каля 39 тыс. чалавек, з якіх 31,44 тыс. за кошт сродкаў бюджэту. Гэта значыць, ільвіная доля прыёму – гэта бюджэтныя месцы», – адзначыла Аляксандра Пятрова.

Што датычыцца размеркавання па ўзроўнях адукацыі, з агульнага прыёму па абодвух узроўнях адукацыі больш як 50 тыс. абітурыентаў паступаюць пасля атрымання агульнай сярэдняй адукацыі. «Мы ўсе прафарыентацыйныя мерапрыемствы праводзім менавіта з акцэнтам на тым, каб да нас прыйшлі дзевяцікласнікі, якія атрымаюць у сістэме не толькі рабочую прафесію або спецыяльнасць, якая гарантуе ім атрыманне пасады спецыяліста сярэдняга звяна, але і агульную сярэднюю адукацыю, што прадугледжана Кодэксам Рэспублікі Беларусь аб адукацыі», – растлумачыла намеснік начальніка.

На ўзроўні прафесійна–тэхнічнай адукацыі ёсць магчымасць пры наяўнасці дадатковай патрэбнасці арганізацый–заказчыкаў кадраў карэкціраваць кантрольныя лічбы прыёму ў бок павелічэння да жніўня, фактычна да канца прыёмнай кампаніі. «Таму 29 тыс. – гэта мінімальная колькасць абітурыентаў, якіх прымуць у жніўні. У мінулым годзе мы павялічылі прыём больш чым на паўтары тысячы, у прынцыпе, лічбы могуць змяняцца», – адзначыла яна.

БЕЛТА