01.04.2026 - 16:35

Падрыхтоўка да летняга сезона на Святым возеры ў Магілёве ідзе поўным ходам: спецыялісты прыступілі да ўладкавання новых дарожак, мантажу асвятлення і ўстаноўкі спортабсталявання. Пра гэта расказаў намеснік дырэктара па будаўніцтве Магілёўскага гарадскога камунальнага унітарнага прадпрыемства цеплаэнергетыкі Максім Лыскоўскі.

На тэрыторыі Святога возера зараз працуюць вопытныя прафесіяналы прадпрыемства. Паводле слоў Максіма Лыскоўскага, адначасова выконваюцца некалькі відаў работ па добраўпарадкаванні. «На бягучы дзень на аб'екце выконваюцца работы па добраўпарадкаванні дарожак, веладарожак і тратуарных дарожак. Таксама будуць праведзены работы па ўладкаванні асвятлення па перыметры ўсяго возера. Акрамя таго, на днях мы прыступім да ўзвядзення шпунтавай сценкі з боку прыватнага сектара вуліцы Лізы Чайкінай», – адзначыў намеснік дырэктара.

Ён таксама падкрэсліў, што пасля завяршэння ўсіх этапаў возера набудзе зусім новае аблічча. Тэрыторыя па перыметры будзе абсталявана зручнымі шляхамі для пешаходаў і веласіпедыстаў, якасным асвятленнем і ахоўнай сценкай.

Адмысловая ўвага надаецца камфорту адпачывальнікаў. Для жыхароў Магілёва на пясчаным пляжы ўсталююць парасоны і лежакі. Для зручнасці наведвальнікаў таксама прадугледжаны пітныя фантанчыкі і душавыя кабінкі. Ужо зараз на аб'екце гатовы чатыры спартыўныя пляцоўкі для дзяцей, аснашчаныя сілавымі трэнажорамі і гульнявымі комплексамі.

Графік уводу аб'ектаў у эксплуатацыю разбіты на этапы з улікам умоў надвор'я і сезона. «У сувязі з тым, што аб'ект вялікі, пляжную зону з усім інвентаром – парасонамі і ляжакамі – мы здамо да пачатку пляжнага сезону, да 1 траўня. Астатнія працы, звязаныя з добраўпарадкаваннем, кладкай пліткі і асвятленнем, плануем завяршыць да канца ліпеня», – растлумачыў Максім Лыскоўскі.

Комплекснае абнаўленне папулярнага месца адпачынку ў Магілёве дазволіць зрабіць знаходжанне на Святым возеры больш бяспечным, зручным і цікавым для людзей розных узростаў.

БЕЛТА