30.01.2026 - 18:05

У Магілёве назвалі імя найлепшага педагога 2026 года. Ім стаў настаўнік гісторыі сярэдняй школы №34 Ілля Кіртока. Цырымонія ўзнагароджання прайшла ў сценах сярэдняй школы нумар 24, дзе адбыўся фінал гарадскога этапа рэспубліканскага конкурсу прафесійнага майстэрства «Настаўнік года».


Шлях да звання лепшага настаўніка горада аказаўся марафонам педагагічнага майстэрства. Канкурсанты прайшлі некалькі этапаў: спачатку ўнутрышкольны адбор, потым падрыхтоўку відэа-візітоўкі і абагульненне педагагічнага вопыту завочна. Але самымі складанымі іспытамі сталі ўрокі ў незнаёмых класах і правядзенне майстар-класаў для калег з усяго горада.

14 фіналістаў, якія прадстаўлялі розныя намінацыі, узняліся на сцэну школы №24. Тут іх чакалі завяршальныя іспыты: творчая самапрэзентацыя і брыфінг, дзе настаўнікам задавалі няпростыя пытанні аб сучаснай адукацыі.

- Конкурс «Настаўнік года» - гэта не проста спаборніцтва, а магутны імпульс для развіцця ўсяго педагагічнага асяроддзя горада. Мы бачым, як расце майстэрства, нараджаюцца новыя ідэі, умацоўваюцца прафесійныя сувязі. Для нас, як сацыяльных партнёраў, асабліва каштоўна, што гэты конкурс яскрава дэманструе ролю каманднай падтрымкі школы і прызнанне настаўніцкай працы на самым высокім узроўні, - адзначыла старшыня гарадской арганізацыі Беларускага прафсаюза работнікаў адукацыі і член журы Іна Галоднікава.

У кожнай з сямі намінацый вызначыўся свой пераможца, але званне найлепшага заваяваў гісторык Ілья Кіртока.

Сам пераможца падзяліўся сваім бачаннем сучаснага настаўніка: «Гісторыя - гэта не проста даты і падзеі ў падручніку. Гэта жывая тканіна, якая звязвае мінулае з сучаснасцю. Мая задача як настаўніка - не проста перадаць веды, а запаліць у вучнях іскру цікаўнасці, навучыць іх задаваць пытанні і самастойна шукаць адказы. Сучасны педагог - гэта не транслятар інфармацыі, а навігатар у свеце ведаў».

Цяпер Ілья Кіртока і іншыя пераможцы намінацый чакае падрыхтоўка да абласнога этапу конкурсу. Увесну яны будуць бараніць гонар Магілёва, каб, магчыма, працягнуць шлях да рэспубліканскага фіналу і звання лепшага настаўніка Беларусі.

mogilev.1prof.by