05.02.2026 - 09:25

Рэспубліканскі конкурс на лепшы дзіцячы малюнак на экалагічную тэматыку стартаваў у Беларусі. Аб гэтым паведамілі ў прэс-службе Міністэрства прыродных рэсурсаў і аховы навакольнага асяроддзя.

Конкурс праводзіцца ў мэтах фарміравання экалагічнай культуры, выхавання беражлівых адносін да прыроды. У ім могуць прымаць удзел выхаванцы ўстаноў дашкольнай адукацыі, навучэнцы ўстаноў агульнай сярэдняй адукацыі і дадатковай адукацыі дзяцей і моладзі ў дзвюх узроставых групах: ад 3 да 5 гадоў і ад 6 да 10 гадоў.

Да ўдзелу дапускаюцца работы, выкананыя на працягу года. Кожная праца, якая прадстаўляецца на конкурс, суправаджаецца інфармацыйным лістом удзельніка з указаннем наймення ўстановы адукацыі, прозвішча, уласнага імя і ўзросту аўтара, паштовага адраса і кантактнага тэлефона. Работы прадстаўляюцца ў каляровым варыянце на лістах фарматам ад А4 да А1.

Конкурс праводзіцца ў тры этапы: першы (1 лютага - 1 сакавіка) - вызначаюцца лепшыя работы на раённым і гарадскім узроўнях; другі (2 сакавіка - 1 красавіка) - вызначаюцца найлепшыя работы на абласным узроўні; трэці (2 красавіка - 1 мая) - вызначаюцца найлепшыя работы на рэспубліканскім узроўні.Падвядзенне вынікаў конкурсу ажыццяўляецца рэспубліканскім арганізацыйным камітэтам з вызначэннем першага, другога і трэцяга месца ў кожнай узроставай групе. Работы, якія не перамаглі ў конкурсе, накіроўваюцца арганізацыйным камітэтам удзельніку конкурсу.

Узнагароджанне пераможцаў першага этапа конкурсу праводзяць раённыя, гарадскія, гарадскія і раённыя, Мінскі гарадскі арганізацыйныя камітэты, другога - абласныя арганізацыйныя камітэты, трэцяга - рэспубліканскі аргкамітэт.

Пры разглядзе работ, прадстаўленых на конкурс, членамі арганізацыйнага камітэта ўлічваецца паўната раскрыцця тэмы намінацыі, колькасць работ, выхаваўчая і грамадская каштоўнасць, яркасць і арыгінальнасць падачы матэрыялу.

БЕЛТА