12.02.2026 - 08:45

Лепшую бабулю краіны абяруць сёлета ў Беларусі. Такі конкурс на рэспубліканскім узроўні пройдзе ўпершыню. Аб гэтым журналістам расказала старшыня Беларускага саюза жанчын (БСЖ) Вольга Шпілеўская.

Планамі на гэты год Вольга Шпілеўская падзялілася 11 лютага з журналістамі ў часе сустрэчы з актывам Магілёўскай абласной арганізацыі БСЖ.

Вольга Шпілеўская нагадала, што ў канцы мінулага года Аб'яднаная арганізацыя БСЖ Белаграпрамбанка правяла галіновы конкурс «Супербабуля». «Узрушаючы быў конкурс! Моладзі варта было б павучыцца энергічнасці ва ўдзельніц. Калі яны выходзілі на сцэну, складана было паверыць, што гэтыя жанчыны - ужо бабулі: такія ўсе маладыя, прыгожыя, актыўныя», - падзялілася Вольга Шпілеўская.

Старшыня БСЖ акцэнтавала ўвагу на тым, што конкурс пачнецца з раённых адбораў. Прычым для некаторых раёнаў такі конкурс будзе не ў навінку. Але зараз ён атрымае большую ўвагу і іншае гучанне.

«У рэгіёнах робіцца нямала цікавых праектаў, некаторыя ў нечым сугучныя адзін з адным. Часам усё гэта трэба аб'яднаць, стварыць прыгожую схему, па якой гэта мусіць працаваць, каб атрымаўся належны эфект. Лічу, што ў нас павінны быць адзначаны ўсе катэгорыі жанчын, рознага ўзросту і статусу», - падкрэсліла Вольга Шпілеўская.

Гэты конкурс - гэта частка рэспубліканскага плана мерапрыемстваў па правядзенню ў 2026 годзе Года беларускай жанчыны, зацверджанага пастановай Саўміна № 69 ад 7 лютага 2026 года.

Акрамя таго, Вольга Шпілеўская расказала, што ў планах яшчэ пасадка яблыневага саду і конкурс шматдзетных сем'яў. «Хочацца, каб усе мерапрыемствы закранулі кожную жанчыну. Каб кожная беларуска, якая жыве ў нашай краіне, адчула на сабе, што такое Год беларускай жанчыны. Для гэтага мы збіраемся з нашымі актывістамі, каб усё гэта абмеркаваць і разумець, як і якімі механізмамі ўсё гэта будзе рэалізавана», - адзначыла яна.

«Галоўнае для беларускіх жанчын сёлета, як і ва ўсе наступныя, - быць жанчынамі і разумець, што ў тваёй краіне ў цябе ёсць магчымасць поўнасцю сябе рэалізаваць. Рэалізаваць сябе як маці, у прафесіі, у грамадскай дзейнасці, што таксама немалаважна. Мы бачым, што нашы беларускі сапраўды могуць усе. Яны яшчэ імкнуцца быць карыснымі тым людзям, якія іх акружаюць, унесці свой уклад у развіццё краіны. І мне падаецца, гэта вельмі важна, вельмі заўважна. І я ўпэўнена, што так будзе не толькі ў 2026 годзе, так будзе і надалей працягвацца. І, напэўна, гэты год аб'яўлены кіраўніком дзяржавы Годам беларускай жанчыны за іх заслугі і ўклад у развіццё краіны», - заявіла Вольга Шпілеўская.

БЕЛТА