24.07.2026 - 08:38

У Магілёўскай вобласці з 1 верасня 50 устаноў адукацыі падключацца да аўтаматызаванай сістэмы «Электронная школа». Пра гэта расказала начальнік галоўнага ўпраўлення па адукацыі Магілёўскага аблвыканкама Людміла Здорыкава.

Гэты праект дасць магчымасць перавесці дакументаабарот у лічбавы фармат і забяспечыць бацькам кругласутачны доступ да інфармацыі аб паспяховасці дзяцей. Да аўтаматызаванай сістэмы «Электронная школа» з 1 верасня падключацца як гімназіі і гарадскія школы, так і сельскія. Установы размеркаваны раўнамерна па ўсёй вобласці.

Паводле слоў Людмілы Здорыкавай, сістэма адпавядае патрэбнасцям сучаснага дня і дае магчымасць адукацыі ісці ў нагу з часам. “Гэта электронны часопіс і электронны дзённік. Сістэма зменшыць папяровы дакументаабарот, што ў перспектыве спросціць узаемадзеянне ўсіх удзельнікаў адукацыйнага працэсу. Для педагогаў скароціцца колькасць папяровых дакументаў, – адзначыла яна. – А для бацькоў з'явіцца магчымасць практычна ў рэжыме анлайн кантраляваць паспяховасць, наведванне заняткаў дзіцяці і быць на сувязі з класным кіраўніком 24/7».

Людміла Здорыкава падкрэсліла, што платформа здольна да далейшага развіцця. З часам да базавых налад будуць дадавацца дадатковыя функцыі для навучэнцаў, педагогаў і бацькоў.

У ведамстве ўдакладнілі, што калі ўстанова ўжо выкарыстоўвае іншыя электронныя платформы, яны прадоўжаць працаваць у штатным рэжыме. Для ўстаноў адукацыі ў новым праекце прадугледжаны навучальныя вэбінары і пастаянная тэхнічная падтрымка. З 1 верасня працу ў гэтай сістэме пачнуць 300 школ Беларусі. Паэтапны пераход на «лічбу» ў астатніх установах краіны плануецца ажыццявіць на працягу 2026/27 навучальнага года.

Галоўная мэта праекта – павышэнне якасці кіравання школай і мінімізацыя папяровай нагрузкі для педагогаў.

БЕЛТА