01.07.2026 - 09:07

У Магілёве да святкавання Дня Незалежнасці падрыхтавалі больш за 30 мерапрыемстваў, у тым ліку тэатральныя прэм'еры, кінапаказы, выставы і канцэрты. Пра гэта паведамілі ў аблвыканкаме.

Святочная праграма стартуе 2 ліпеня. На адкрытай пляцоўцы каля абласной бібліятэкі ім. В.І. Леніна будзе працаваць інтэрактыўная выставачная лакацыя «Дзень Незалежнасці – сімвал адраджэння, міру і адзінства». Днём на вул.Бярозаўскай, 1, пройдзе тэматычная праграма, прысвечаная творчасці Канстанціна Сіманава.

Увечары 2 ліпеня гледачам прапануюць прэм'еру медыйнага спектакля «А зоры тут ціхія…» у абласным драматычным тэатры, а таксама пакажуць беларускі фільм «На іншым беразе» ў кінатэатры «Космас». У двары тэхналагічнага каледжа адбудзецца відэачэлендж «Мы разам!».

3 ліпеня цэнтрам урачыстасцей стане мемарыяльны комплекс «Буйніцкае поле», дзе пройдзе тэатралізаваны мітынг, прымеркаваны да 85–годдзя гераічнай абароны Магілёва. У гэты дзень музеі горада адчыняць свае дзверы для наведвальнікаў: у краязнаўчым музеі і філіяле «Музей Славы Магілёўшчыны» будуць працаваць экспазіцыі, прысвечаныя Вялікай Айчыннай вайне, пройдуць і паказы ваенных фільмаў.

Для сямейнага адпачынку арганізатары падрыхтавалі насычаную праграму. На плошчы Адзінства і ў Камсамольскім скверы разгорнецца выстаўка–кірмаш рамеснікаў «Скарбніца талентаў», будзе арганізавана і займальная пляцоўка «Квітней, Беларусь!». Каля дзіцячай школы выяўленчых мастацтваў можна будзе ўбачыць выставу работ навучэнцаў «Беларусь – маё натхненне».

Музычнае суправаджэнне свята забяспечаць розныя калектывы. Так, на плошчы каля Музея Славы Магілёўшчыны з 13.00 пачнецца святочны канцэрт «Беларусь – мая краіна!», які завершыцца галоўным вячэрнім канцэртам у 21.30. Кульмінацыяй вечара стане рэспубліканская акцыя «Праспяваем гімн разам!» у 22.55 і святочны феерверк у 23.00.

Таксама ў праграме заяўлены выступленні ансамбля «Злата–Срэбра» з Пензы, спартыўныя святы на некалькіх адкрытых пляцоўках горада і паказы мастацкіх фільмаў у кінатэатрах «Космас» і «Радзіма».

БЕЛТА