Міжнародны злёт, прысвечаны 85-годдзю гераічнай абароны Магілёва, праходзіць у кадэцкім вучылішчы

У Магілёўскім абласным кадэцкім вучылішчы імя Героя Савецкага Саюза Яўгена Нікалаенка стартаваў міжнародны злёт, прысвечаны 85–й гадавіне абароны Магілёва ў гады Вялікай Айчыннай вайны.

Галоўнай тэмай форуму, які аб'яднаў юных патрыётаў з Беларусі і Расіі, стала захаванне гістарычнай памяці аб подзвігу абаронцаў горада ў 1941 годзе.

У сустрэчы бяруць удзел сем каманд. Гэта выхаванцы ваенна–патрыятычных клубаў Магілёўскай вобласці, а таксама кадэты з розных рэгіёнаў Беларусі і Расійскай Федэрацыі.

Праграма злёту насычаная і разлічана на два дні. У першы дзень удзельнікам трэба прадставіць творчую візітную картку, а таксама паказаць свае веды ў інтэлектуальным квізе, прысвечаным гісторыі Вялікай Айчыннай вайны і абароне Магілёва.

На другі дзень арганізатары падрыхтавалі шырокую праграму спаборніцтваў: падцягванні, кіданне гранаты, эстафеты – выпрабаванні на сілу, спрыт і камандны дух.

Дырэктар Магілёўскага абласнога кадэцкага вучылішча Юрый Грышанаў, адкрываючы мерапрыемства, падкрэсліў, што галоўная мэта ўшанаваць памяць герояў і ўмацаваць міжрэгіянальнае супрацоўніцтва паміж Беларуссю і Расіяй, перадаць падрастаючаму пакаленню ідэі адзінства і патрыятызму.

На памяць аб сустрэчы ўдзельнікі злёту высадзілі кедр, як сімвал дружбы, адзінства і непарушных сувязей паміж Беларуссю і Расіяй.

Па матэрыялах mogilevnews.by