10.02.2026 - 09:30

Выпрабаванне на трываласць

Каб цяпло і гарачая вада ў жылыя дамы і арганізацыі паступалі бесперабойна, цеплаэнергетыкі працуюць круглы год. Ацяпляльны сезон - асабліва такі, якім выдаўся цяперашні, - становіцца для іх сур'ёзным іспытам, і яму папярэднічае вялікая падрыхтоўчая і прафілактычная праца. Здаць яго - значыць апраўдаць давер людзей.

Магілёўскае гарадское камунальнае унітарнае прадпрыемства цеплаэнергетыкі забяспечвае цяплом больш за 90 працэнтаў спажыўцоў абласнога цэнтра. У яго вядзенні не магістральныя, а квартальныя цеплавыя сеткі ўнутры гарадской забудовы. Першыя - трубы вялікага дыяметра, якія дастаўляюць цяпло ад цеплакрыніцы да цэнтральнага цеплавога пункта, а другія размяркоўваюць яго спажыўцам. Гэта як артэрыі і вены ў крывяноснай сістэме арганізма, тлумачыць дырэктар прадпрыемства Юры Афанасьеў:

- У нас на балансе шэсць кацельняў, пяць з якіх працуюць на мясцовых відах паліва, а адна - камбінаваная. Таксама да нас адносяцца 160 цэнтральных цеплавых пунктаў і 600 кіламетраў цепласетак, частка якіх мяняем па праграме «Камфортнае жыллё і спрыяльнае асяроддзе», частка - за ўласныя сродкі. Стараемся рабіць больш, каб мінімізаваць рызыкі пашкоджанняў у ацяпляльны сезон.

Старыя трубы мяняюць на перадізаляваныя. Яны гарантавана праслужаць чвэрць стагоддзя без парушэння цэласнасці, а таксама знізяць цепластраты - эканамічны эфект вылічаецца ў тонах умоўнага паліва. Больш за тое, для новых труб прадугледжана сістэма аператыўнага дыстанцыйнага кантролю, якая дазваляе адсочваць стан цеплавой сеткі. Гэта, падкрэслівае Юрый Афанасьеў, незаменна ў ацяпляльны перыяд:

- Падрыхтоўчая праца заключаецца ў рэвізіі цэнтральных цеплавых пунктаў, помпаў, шаф кіравання, замене цеплавых сетак - толькі сёлета перакладзена амаль 20 кіламетраў цеплатрасы. У кацельнях ствараецца неабходны запас паліва. Акрамя таго, штогод праводзяцца выпрабаванні цеплавых сетак з адключэннем гарачай вады: парогавыя значэнні тэмпературы і ціску дапамагаюць выявіць слабыя месцы, дзе пры вялікіх нагрузках могуць адбыцца пашкоджанні. Такія ўчасткі лакалізуюцца і аднаўляюцца ў прыярытэтным парадку.

Чым больш недахопаў цеплаэнергетыкі выявяць у цёплы час года і міжсезонне, тым спакайней перажывуць халады. Аднак ад аварыйных сітуацый ніхто не застрахаваны: пры нестабільных вулічных тэмпературах ідзе вялікі рух грунта, адпаведна, падземныя камунікацыі трапляюць у зону падвышанай рызыкі. Але Юры Афанасьеў упэўнены:

- Любая, нават сур'ёзная няспраўнасць не павінна адбівацца на камфорце людзей. І для гэтага ў нас ёсць рэзервовыя крыніцы электразабеспячэння, якія спрацоўваюць аўтаматычна ўсяго праз некалькі хвілін пасля адключэння асноўных сістэм. У мароз іх прымусова запускаюць адзін раз у суткі, каб перастрахавацца і праверыць спраўнасць. Важна зрабіць усё, каб спажыўцы не засталіся без цяпла.

Для купіравання праблемных сітуацый у кругласутачным рэжыме працуе аварыйная брыгада. Яе каардынуе дыспетчарская служба - своеасаблівая «хуткая дапамога», якая аператыўна рэагуе на ўзніклую праблему і шукае шляхі яе вырашэння. Спецыяліст па зваротах грамадзян і юрыдычных асоб прадпрыемства Святлана Гуляшова тлумачыць:

- Дыспетчарызацыя - гэта сістэма выдаленага кантролю і кіравання цэнтральным цеплавым пунктам. Яна ператварае звычайны цеплавы пункт у разумны, дазваляючы бесперапынна сачыць за яго працай і рэгуляваць працэсы дыстанцыйна. Адмысловыя датчыкі вымяраюць тэмпературу і ціск у трубах, а затым перадаюць лічаную інфармацыю на кампутар дыспетчара. У выніку спецыяліст кантралюе параметры цэнтральных цеплавых пунктаў, а таксама імгненна атрымлівае сігнал аб непаладках.

Сучасны падыход да эфектыўнага і эканомнага цеплазабеспячэння горада немагчымы без зваротнай сувязі, якую даюць звароты ў службу 115. Для цеплаэнергетыкаў любая заяўка - гэта дапамога і падказка: важна разабрацца з сітуацыяй да таго, як яна ператварылася са штатнай у крытычную. Працуюць на прадпрыемстве і над зніжэннем цепластрат.

Галоўнае правіла эканоміі - рацыянальнае выкарыстанне рэсурсаў: людзі не павінны тапіць вуліцу, а абсталяванне працаваць на мяжы магчымасцяў. У сувязі з гэтым слушная парада ад Прэзідэнта: не перашчыраваць з тэмпературай, каб захаваць ацяпляльную сістэму.

СБ