Новы падземны пераход з ліфтамі і тэматычным афармленнем адкрылі ў Магілёве

Новы падземны пераход адкрылі ў Магілёве на скрыжаванні праспекта Міра і вуліц Якубоўскага і Касманаўтаў.

Новы аб'ект уяўляе сабой падземную галерэю працягласцю 60 м з трыма выхадамі і лесвіцамі з антыслізготным пакрыццём. Ён абсталяваны сістэмай відэаназірання, пяццю святлодыёднымі экранамі. Акрамя таго, тут устаноўлены два ліфты.

Будаўніцтва падземнага перахода заняло 10 месяцаў. «Сёння па даручэнні старшыні Магілёўскага аблвыканкама Анатоля Ісачанкі мы адкрываем тут рух, – сказаў старшыня Магілёўскага гарвыканкама Сяргей Чарткоў. – Перш за ўсё я хачу сказаць вялікі дзякуй аблвыканкаму за падтрымку і фінансаванне. Вялікі дзякуй будаўнікам – працаваць ім даводзілася ў няпростых умовах. Дзякуй жыхарам нашага горада, якія цярпелі некаторыя часовыя нязручнасці, звязаныя з перакрыццём руху».

Яшчэ адна асаблівасць новага пераходу – яго тэматычнае афармленне. «Мы прысвяцілі яго гераічнай абароне і вызваленню Магілёва ў гады Вялікай Айчыннай вайны. У галерэі на сценах можна ўбачыць партрэты тых военачальнікаў, якія, перш за ўсё, вызвалялі горад – гэта былі войскі II Беларускага фронту, – распавёў Сяргей Чарткоў. – Выбраная тэматыка накіравана ў першую чаргу на маладое пакаленне, на студэнтаў, якія вучацца тут побач. Галоўнае, каб мы не забываліся, якім коштам нам далася Перамога і свабода нашай дзяржавы».

Як адзначыў старшыня гарвыканкама, новы падземны пераход – гэта 21–я чарга будаўніцтва вялікай ўнутрыкольцавай аўтамагістралі. «Далей у нас плануецца пуцеправод над вуліцай Першамайскай, у планах на наступны год – адкрыць дарогу паміж двума кольцамі, – адзначыў старшыня гарвыканкама. – Кальцавы рух на праспекце Міра, усталёўка тут танка, падземны пераход – гэта ўсё частка вялікай будоўлі».

Адразу пасля адкрыцця руху па падземным пераходзе гараджане ацанілі яго зручнасць і сучаснасць. «Мы вельмі чакалі, бо тут не хапала падземнага пераходу. Па–першае, ён вельмі прыгожы. Па–другое, на сценах адлюстраваны гістарычныя моманты – для дзяцей, для школьнікаў і жыхароў горада гэта тое, што дакладна трэба, – падзялілася ўражаннямі магіляўчанка Вольга Міхнуціна. – Мне спадабалася, што абсталяваны спускі для калясак, ёсць ліфты. Для маці з дзецьмі, веласіпедыстаў і маламабільных людзей гэта вельмі важна і патрэбна».

Дзяўчына жыве непадалёк, а таму сачыла за ходам будаўніцтва новага кальца. «Калі фармавалі кальцо, было трохі няёмка дабірацца да працы з–за перакрыццяў. Цяпер паток транспарту ідзе лёгка і хутка. І нам, пешаходам, цяпер зручна і больш бяспечна перамяшчацца з аднаго боку дарогі на іншы», – распавяла яна.

Адзначыла жыхарка горада і тое, як зменьваецца Магілёў. «Горад мяняецца ў лепшы бок: як шмат зрабілі на пешаходнай вуліцы, якая прыгожая зараз плошча Славы і прылеглая да яе тэрыторыя. Прыемна шпацыраваць па горадзе, назіраць усе гэтыя новаўвядзенні, новыя разынкі, што з'яўляюцца ў Магілёве, – дзеліцца гараджанка. – Гонар бярэ за наш такі прыгожы і добраўпарадкаваны горад».

БЕЛТА