24.04.2026 - 15:04

Урачыстая адпраўка прызыўнікоў Магілёўскай вобласці на тэрміновую ваенную службу прайшла сёння, 24 красавіка, на абласным зборным пункце ў Магілёве. Шэрагі Узброеных Сіл папоўнілі амаль 170 навабранцаў, якія будуць служыць у 103–й асобнай гвардзейскай паветрана–дэсантнай брыгадзе ў Віцебску.

Магіляўчанін Юрый Кулінічэнка да вайсковай службы гатовы маральна і фізічна. Прызнаецца, што для яго гэта будзе новы і вельмі цікавы досвед:

– Служба ў войску – важны этап у жыцці кожнага мужчыны, яе трэба прайсці з гонарам і годнасцю, не падводзіць сваіх родных і блізкіх. Думаю, у войскі можна шмат чаму навучыцца, нават элементарна падцягнуць сваю фізічную падрыхтоўку.

Бацькі прызыўніка Мікалай і Нона Кулінічэнка настаўляюць сына: важна не проста адсядзецца, а стаць сапраўдным абаронцам краіны:

– Наш сын выканае свой абавязак перад Радзімай і народам, і гэта нагода для гонару. Учора ў коле сяброў і родных мы жадалі яму поспехаў, жадалі з гонарам адслужыць і вярнуцца дадому. І гэтыя словы гаворым у адрас усіх прызыўнікоў: падчас службы трэба праявіць мужнасць і стойкасць, авалодаць зброяй і тэхнікай, а таксама навучыцца перамагаць.

Антон Волкаў таксама папоўніць шэрагі дэсантнікаў, у хлопца ў планах пасля «тэрміноўкі» – служба па кантракце:

— Для мяне не стаяла пытання, ісці ў войска ці не: мой прадзед, дзед і бацька таксама служылі, і зараз я прытрымліваюся іх прыкладу. З ранніх гадоў яны вучылі мяне бараніць сваю краіну, быць адданым свайму народу. Не раз у нашай сям'і гучала фраза: «Жыццё – Айчыне, гонар – нікому».

Намеснік ваеннага камісара Магілёўскай вобласці Максім Касянкоў падкрэсліў, што ў краіне праводзіцца завяршальны этап прызыўной кампаніі. Ужо 23 мая сённяшніх навабранцаў можна будзе павіншаваць з урачыстым прынясеннем воінскай прысягі:

— Ва Узброеныя Сілы Рэспублікі Беларусь, іншыя войскі і воінскія фарміраванні прыйшло маладое папаўненне. Ужо сёння яны пачуюць сваю першую каманду – «адбой», а заўтра пачнуць раніцу з каманды «ўздым». Служба ў войску будзе ўпісана ў іх аўтабіяграфію, і гэтым будуць ганарыцца іх сябры і родныя: для навакольных яны стануць прыкладам. Жадаю кожнаму навабранцу ўпэўнена ісці па жыцці наперад і заўсёды стаяць на абароне суверэнітэту і тэрытарыяльнай цэласнасці нашай краіны.

З цёплымі пажаданнямі і віншаваннямі да прызыўнікоў звярнулася намеснік старшыні Магілёўскага гарвыканкама Вера Багайчук:

– У 2026 годзе мы святкуем 85–годдзе абароны Магілёва, якая гераічна ішла 23 дні. У сувязі з гэтай памятнай датай хачу пажадаць навабранцам быць дастойнымі спадкаемцамі Вялікай Перамогі і заўсёды памятаць, што самая вышэйшая каштоўнасць – гэта мірнае неба над галавой.


 СБ, фота газеты «Веснік Магілёва»