24.04.2026 - 18:50

У Магілёўскім аблвыканкаме сёння адбыўся семінар–практыкум «Актуальныя пытанні арганізацыі працы СМІ». Удзел у мерапрыемстве прынялі начальнікі аддзелаў ідэалагічнай работы і па справах моладзі гаррайвыканкамаў, адміністрацый раёнаў у гарадах Магілёве і Бабруйску, а таксама галоўныя рэдактары сродкаў масавай інфармацыі Магілёўскай вобласці.


З прывітальным словам да прысутных звярнулася начальнік упраўлення па працы са сродкамі масавай інфармацыі і маладзёжнай палітыкі галоўнага ўпраўлення ідэалагічнай работы і па справах моладзі аблвыканкама Вераніка Вільчык. Яна падкрэсліла значнасць сістэмнага прафесійнага дыялогу ва ўмовах сучасных інфармацыйных выклікаў, адзначыўшы, што давядзенне праўдзівай і дакладнай інфармацыі да насельніцтва і ўмацаванне канструктыўнага дыялога паміж грамадствам і дзяржавай мае першараднае значэнне для СМІ. Таксама Вераніка Вільчык звярнула ўвагу, што сучасная інфармацыйная прастора прад'яўляе да медыяў новыя патрабаванні, звязаныя з развіццём лічбавых тэхналогій і неабходнасцю аператыўнага рэагавання на грамадска значную інфармацыю. «Гэта прымушае рэдакцыі быць гнуткімі, прафесійнымі, пастаянна ўдасканальвацца», – падкрэсліла яна. І выказала ўпэўненасць у тым, што выступленні запрошаных спецыялістаў будуць карысныя кожнаму ўдзельніку, пры гэтым заклікаўшы прысутных да актыўнага дыялога.


Цэнтральнай тэмай семінара стала супрацьдзеянне дэструктыўнаму інфармацыйнаму ўздзеянню. Галоўны дырэктар галоўнай дырэкцыі Інтэрнет–вяшчання Белтэлерадыёкампаніі Аляксандр Харавец і намеснік галоўнага дырэктара – загадчык аддзела Інтэрнет–навін Арцём Строганаў выступілі па тэме «Маніпулятыўны кантэнт як адна з форм кагнітыўнай вайны». Эксперты дэталёва разабралі механізмы распаўсюджвання маніпулятыўных матэрыялаў у лічбавым асяроддзі, прывялі актуальныя прыклады і пазначылі алгарытмы своечасовага выяўлення і нейтралізацыі падобнага кантэнту. Асаблівы акцэнт быў зроблены на ролі рэгіянальных рэдакцый у фарміраванні ўстойлівага інфармацыйнага імунітэту грамадства.


Аб практыцы рэалізацыі норм Указа Прэзідэнта Рэспублікі Беларусь ад 5 снежня 1997 г. № 630 «Аб рэагаванні на грамадска значную інфармацыю» (у рэдакцыі Указа ад 3 снежня 2024 г. № 452), а таксама пастановы Савета Міністраў Рэспублікі Беларусь ад 30 снежня 2024 г. № 1039 распавёў намеснік дырэктара Інфармацыйнага агенцтва «Магілёўскія ведамасці» Анатоль Метта. Пытанні кадравага забеспячэння галіны былі ўзняты ў выступленні галоўнага спецыяліста ўпраўлення ідэалагічнай работы галоўнага ўпраўлення ідэалагічнай работы і па справах моладзі аблвыканкама Ліліі Дарашковай. Аб удасканаленні ўзаемадзеяння рэдакцый друкаваных СМІ з друкарняй праінфармаваў дырэктар абласной узбуйненай друкарні імя Спірыдона Собаля Дзмітрый Алямасаў.


Юлія Таранава, фота Галіны Гаўрыловіч