19.02.2026 - 14:20

У Магілёўскім дзяржаўным політэхнічным каледжы дзень інфармавання на тэму «Абарончая моц беларускага войска і патрыятызм у сучасных умовах» пачаўся ў фармаце інтэрактыву. Выкладчыкі з навучэнцамі распрацавалі віртуальныя экскурсіі па беларускіх музеях, інтэрактыўныя гульні. Напрыклад, адна з такіх гульняў «Зброя Перамогі» карыстаецца папулярнасцю ў людзей усіх узростаў, калі каледж дэманструе свае распрацоўкі на свяце «Александрыя збірае сяброў». У якасці спікера перад навучэнцамі выступіў памочнік Прэзідэнта - інспектар па Магілёўскай вобласці Сяргей Налівайка.


Размова ў маладзёжнай аўдыторыі атрымалася шчырай, у фармаце дыялогу. Што такое патрыятызм, чаму на сучасным этапе актуальна казаць пра абарончую моц беларускага войска – на гэтыя і іншыя пытанні ўдзельнікі сустрэчы разважалі разам.

Сяргей Налівайка адзначыў, што напружаная абстаноўка вакол нашай краіны, сучасныя ўзброеныя канфлікты даказваюць актуальнасць абарончай моцы беларускай арміі:

- Беларусь заўсёды транслюе міралюбнасць і гасціннасць, але трымаць порах сухім у гэты час неабходна. Наш Прэзідэнт заўсёды адкрыта заяўляе, што Беларусь гатова жорстка адказаць у выпадку знешняй агрэсіі і парушэння граніц. А да слоў Аляксандра Лукашэнкі ва ўсім свеце прыслухоўваюцца. Беларускае войска ўвайшло ў рэйтынг наймацнейшых у свеце. Раптоўныя праверкі боегатоўнасці Узброеных Сіл, іх актыўная мадэрнізацыя - усе гэтыя меры накіраваны на тое, каб захаваць мір. Як гаворыць Кіраўнік дзяржавы, кожны мужчына павінен умець пастаяць за сваю краіну, сваю сям'ю. На мой погляд, гэта і ёсць патрыятызм - любоў да сваёй зямлі, гатоўнасць абараняць суверэнітэт, традыцыйныя каштоўнасці.

Да развагі аб патрыятызме падключылася аўдыторыя. Навучэнка каледжа Дар'я Дадкова задала памочніку Прэзідэнта філасофскае пытанне: патрыятызм - гэта веданне гісторыі або ўменне дзейнічаць тут і цяпер на карысць сваёй краіны? Дзяўчына ўпэўнена, што быць патрыётам можна і навучаючыся ў каледжы, і на сваім працоўным месцы. Сяргей Налівайка падзяліўся меркаваннем, што веданне сваёй гісторыі дапамагае не рабіць памылак і ў важныя гістарычныя моманты аказвацца на правільным баку. Паспяховыя людзі, дадаў Сяргей Налівайка, глыбока ведаюць гісторыю, і лепшы прыклад - Прэзідэнт.

Навучэнец 4-га курса Глеб Волкаў лічыць, што быць патрыётам - значыць шанаваць усё тое, што робіць дзяржава для свайго народа:

- Я вучуся па вельмі запатрабаванай на беларускіх прадпрыемствах спецыяльнасці - аператар станкоў з ЧПУ. Ужо размеркаваўся на Магілёўскі аўтамабільны завод, які апошнія гады вельмі развіваецца ў тэхналогіях. Збіраюся атрымаць потым вышэйшую адукацыю. У краіне ёсць усе магчымасці для моладзі. Актыўна ўдзельнічаю ў праекце «Вахта Памяці», абавязкова пайду служыць у войска альбо ў органы ўнутраных спраў.

Майстар вытворчага навучання Кірыл Літрэеў выказаўся аб важнасці таго, каб прызыўнікі праходзілі службу па спецыяльнасці, у тым ліку ў ІТ-ротах, тэхнічных або спецыялізаваных падраздзяленнях. Магілёўскі дзяржаўны політэхнічны каледж вядзе падрыхтоўку кадраў у сферы электронікі, мехатроніка, робататэхнікі, машынабудавання, зварачнай вытворчасці, інфармацыйных тэхналогій. І за апошнія гады праграмісты і зваршчыкі вельмі запатрабаваны беларускім войскам, а для выпускнікоў каледжа гэта магчымасць адпрацоўваць навыкі на практыцы.

У маладзёжнай аўдыторыі размова зайшла і аб карысці чытання кніг, і аб залежнасці ад гаджэтаў, важнасці традыцыйных каштоўнасцей. Сяргей Налівайка падсумаваў: размовы аб патрыятызме як стрыжні светапогляду грамадзяніна павінны весціся кожны дзень — у сям'і, навучальнай установе, на працоўным месцы, што гарантуе згоду ў грамадстве і згуртаванасць народа.

СБ