20.01.2026 - 15:49

Міністэрства па надзвычайных сітуацыях вынесла на грамадскае абмеркаванне праект закона «Аб змене законаў па пытаннях сацыяльнай абароны грамадзян, якія пацярпелі ад катастрофы на Чарнобыльскай АЭС, іншых радыяцыйных аварый», паведамляецца са спасылкай на Нацыянальны прававы інтэрнэт-партал.

Праектам прадугледжваецца ўнясенне змяненняў у законы ад 6 студзеня 2009 года нумар 9-З «Аб сацыяльнай абароне грамадзян, якія пацярпелі ад катастрофы на Чарнобыльскай АЭС, іншых радыяцыйных аварый» і ад 14 чэрвеня 2007 года нумар 239-З «Аб дзяржаўных сацыяльных ільготах, правах і гарантыях для асобных катэгорый грамадзян», а таксама ў артыкулы 326 і 328 Працоўнага кодэкса.

Праектам прадугледжваюцца тэхнічна-рэдакцыйныя карэкціроўкі, унясенне дапаўненняў, выключэнні, прывядзенне ў адпаведнасць з іншымі артыкуламі нарматыўных прававых актаў, а таксама ўстанаўленне новых норм: права на пазачарговае абслугоўванне ва ўстановах аховы здароўя і пазачарговую шпіталізацыю для аказання планавай медыцынскай дапамогі.

Прыняцце праекта таксама запатрабуе карэкціроўкі пастаноў Савета Міністраў ад 20 снежня 2025 года нумар 742 «Аб пытаннях дзяржаўнага сацыяльнага страхавання і пенсійнага забеспячэння», Міністэрства працы і сацыяльнай абароны ад 8 ліпеня 2019 года нумар 35 «Аб парадку звароту па пенсію і арганізацыі работы і вядзення справаводства па прызначэнні і выплаце пенсій» і ад 11 верасня 2019 года №44 «Аб устанаўленні форм даведак для мэт пенсійнага забеспячэння».

Свае заўвагі і прапановы можна выказаць у спецыяльнай тэме на Прававым форуме Беларусі з 20 па 30 студзеня ўключна.

БЕЛТА