У Беларусі зацвердзілі новыя праграмы факультатыўных заняткаў для школьнікаў

У Беларусі зацверджаны новыя праграмы факультатыўных заняткаў для школьнікаў. Пра гэта паведамілі ў пресс–службе Міністэрства адукацыі.

Так, пастановай Міністэрства адукацыі ад 14 жніўня 2026 года № 142 зацверджаны шэраг новых навучальных праграм факультатыўных заняткаў для ўстаноў агульнай сярэдняй адукацыі (з беларускай і рускай мовамі навучання і выхавання). Новаўвядзенні накіраваны на раннюю прафарыентацыю, развіццё практычных навыкаў і творчых здольнасцей навучэнцаў.

Для рабят 1–4–х класаў з'явіцца факультатыў «Асновы фінансавай пісьменнасці». Праграма распрацавана Нацыянальным банкам сумесна з Акадэміяй адукацыі і разлічана на 68 гадзін. Курс завяршае стварэнне адзінай сістэмы фінансавай асветы школьнікаў з 1–га па 9–ы клас. Праз гульнявыя і сітуацыйныя задачы малодшым школьнікам дапамогуць сфарміраваць навыкі бяспечных і эфектыўных паводзін у фінансавай сферы.

Таксама для 8–х класаў з'явіцца факультатыў «Юны інжынер–фізік» (35 гадзін). Ён закліканы паглыбіць веды па фізіцы і матываваць падлеткаў да выбару інжынернага профіля навучання на старэйшай ступені. Заняткі праходзяць паралельна з базавым курсам (цеплавыя, электрамагнітныя і светлавыя з'явы) і робяць упор на эксперыменты, канструяванне, мадэляванне і рашэнне прыкладных задач.

Акрамя таго, рабяты з 1–га па 9–ы класы змогуць займацца на факультатыве «Інструментальны ансамбль (флейта, блокфлейта)». Праграма музычнай накіраванасці разлічана на 34 гадзіны ў 1–2–х класах і 35 гадзін у 3–9–х класах. Курс накіраваны на развіццё слыхавога кантролю, навыкаў калектыўнага музіцыравання і духоўна–эстэтычнае выхаванне школьнікаў.

З тэкстам пастановы і зацверджанымі навучальнымі праграмамі можна будзе азнаёміцца ​​на Нацыянальным адукацыйным партале.

СБ