18.02.2026 - 18:05

Перасовачная выстава мультымедыйнага праекта «Абеліскі вялікага подзвігу» выдавецкага дома «Беларусь сёння», якая наведала дзесяткі гарадоў краіны, сёння, 18 лютага, зрабіла прыпынак у Магілёве. Па традыцыі, да адкрыцця выстаўкі, якая арганізавана пры падтрымцы Міністэрства адукацыі і заслужанага калектыву Рэспублікі Беларусь «Магілёўскі абласны тэатр лялек», адбылося ўрачыстае ўскладанне кветак да знакавага месца. У Магілёве гэта помнік генерал-маёру Івану Лазарэнку, імя якога носяць гарадскія сквер і вуліца.


Поўны георгіеўскі кавалер Іван Сідаровіч прайшоў пяць войнаў, у пачатку Вялікай Айчыннай кіраваў абаронай Брэсцкай крэпасці, праявіў выбітную гераічнасць падчас Магілёўскай франтавой наступальнай аперацыі. На Магілёўшчыне і загінуў, звання Героя Савецкага Саюза быў удастоены пасмяротна.

Памяць легендарнага чалавека, пра якога расказаў яго ўнук Рыгор Лазарэнка - намеснік галоўнага ўрача па медчастцы Магілёўскай клінічнай бальніцы хуткай медыцынскай дапамогі, дарослыя і моладзь горада ўшанавалі хвілінай маўчання.


Інфармацыю пра Івана Сідаровіча, відэаролік пра помнік у будучыні дададуць на сайт obeliski.by. Каб пра героя даведалася як мага больш людзей, у тым ліку падрастаючае пакаленне. У гэтым сэнс праекта: захаваць праўду пра вайну, пра подзвіг нашага народа, пра боль, што давялося яму перажыць. У лічбавым фармаце - вечным дакуменце, які немагчыма знесці, але дзякуючы якому інфармацыя аб тых, хто набліжаў перамогу, становіцца даступная ў адзін клік любому чалавеку. Унук Героя Савецкага Саюза Рыгор Лазарэнка, наведаўшы выставу «Абеліскі вялікага подзвігу», ацаніў маштабнасць і інтэрактыўнасць праекта:

- Ідэя і ўвасабленне выдатныя. Мы павінны памятаць пра вайну, пра тых, хто набліжаў перамогу, пра нявінна забітых. Калі гісторыя застаецца толькі ў камені, цікавасць да яе падрастаючага пакалення можа астыць. Тут яна дыхае - гэты праект жывы. І гэта лепшы спосаб перадаць эстафету памяці ўнукам і праўнукам.


СБ