30.07.2026 - 18:09

З 28 па 29 ліпеня 2026 года на базе Лідскага і Навагрудскага раёнаў Гродзенскай вобласці адбыўся выязны практычны семінар для асоб, якія знаходзяцца ў рэзерве кадраў Магілёўскага аблвыканкама на замяшчэнне кіруючых пасад, уключаных у кадравы рэестр кіраўніка дзяржавы. Мерапрыемства было арганізавана з мэтай абмену вопытам па пытаннях сацыяльна–эканамічнага развіцця рэгіёнаў і ўдасканалення кіраўнічых кампетэнцый. Дэлегацыю ўзначаліў загадчык сектара ўпраўлення кадравай палітыкі аблвыканкама Дзмітрый Пермінаў.


У Лідскім раёне ўдзельнікі наведалі ААТ «Лакафарба», ДП «Конус», азнаёміліся з ходам будаўніцтва мікрараёна «Поўнач» і турыстычным патэнцыялам рэгіёну на прыкладзе Лідскага замка. Адзначаны сучасныя падыходы да арганізацыі вытворчасці, укараненне тэхналогій цынкавання і эфектыўнае выкарыстанне гісторыка–культурнай спадчыны.


У Навагрудскім раёне рэзервісты вывучылі рэалізацыю праекта «Адзін раён – адзін праект» на Навагрудскім заводзе металавырабаў, дзе ўкаранёны рабатызаваныя комплексы і энергаэфектыўныя рашэнні. Таксама адбылося знаёмства з развіццём турызму ў рамках канцэпцыі «Навагрудак – горад–музей», наведванне ФАК «Лідэр» і ААТ «Прынёманскі».


Удзельнікі адзначылі практычную каштоўнасць семінара: адбыўся абмен вопытам у будаўніцтве, прамысловасці, сельскай гаспадарцы і турызме, наладжаны новыя дзелавыя кантакты. Атрыманыя напрацоўкі будуць прыменены на Магілёўшчыне для далейшага сацыяльна–эканамічнага развіцця рэгіёну.


Рэд.