10.06.2026 - 14:33

У рэгіёне актыўнымі тэмпамі ідзе падрыхтоўка ўстаноў адукацыі да новага навучальнага года. Пра гэта расказала начальнік галоўнага ўпраўлення па адукацыі Магілёўскага аблвыканкама Людміла Здорыкава.

Паводле яе слоў, зараз ідзе актыўная фаза падрыхтоўкі да новага навучальнага сезона. І самая першая задача – стварыць камфортныя і бяспечныя ўмовы для дзяцей. «Таму асноўная наша работа накіравана на ўмацаванне матэрыяльна–тэхнічнай базы, на выкананне ўсіх прадпісанняў і рэкамендацый наглядных органаў, – адзначыла яна. – Так, бягучыя рамонты будуць праведзены ва ўсіх установах адукацыі рэгіёну. Акрамя гэтага, у 73 установах адукацыі будуць праведзены капітальныя рамонты. Гэта мадэрнізацыя аўтаномнай пажарнай сістэмы, устаноўка сістэм кантролю доступу ва ўстановы. А таксама – рамонты дахаў, стадыёнаў, бегавых дарожак і гэтак далей».

Акрамя гэтага, значную ўвагу надаюць мадэрнізацыі і абнаўленню харчаблокаў, набываецца халадзільнае і тэхналагічнае абсталяванне. Усё гэта неабходна для таго, каб дзеці былі забяспечаны карысным і смачным харчаваннем.

У гэтым годзе сфера адукацыі рэгіёну прырасце двума новымі аб'ектамі. «Да пачатку навучальнага года мы плануем увод школы на 1020 месцаў па вуліцы Гагарына ў Магілёве. Таксама пачалося будаўніцтва новага дзіцячага сада з басейнам у Мсціславе на 50 месцаў», – распавяла Людміла Здорыкава.

Яна падкрэсліла, што сацыяльная палітыка заўсёды была і застаецца ў прыярытэце нашай дзяржавы. «У цэнтры ўвагі заўсёды – дзеці. Таму гэты вектар не мяняецца, – адзначыла начальнік галоўнага ўпраўлення па адукацыі аблвыканкама. – У гэтым годзе таксама значная частка бюджэту Магілёўскай вобласці будзе накіравана на сацыяльную сферу. Для таго, каб стварыць усе неабходныя ўмовы для развіцця, адукацыі нашых дзяцей. Толькі на падрыхтоўку ўстаноў адукацыі да новага навучальнага года накіравана каля 115 млн рублёў».

БЕЛТА