28.08.2026 - 14:36

Да першага званка засталіся лічаныя дні. Аб тым, як установы адукацыі рэгіёну рыхтуюцца сустрэць сваіх вучняў, якія новаўвядзенні чакаюць дзяцей і бацькоў у маючым адбыцца 2026/2027 навучальным годзе, а таксама аб дадатковых мерах бяспекі расказала начальнік галоўнага ўпраўлення па адукацыі Магілёўскага аблвыканкама Людміла Здорыкава.


Падрыхтоўка да новага навучальнага года ў Магілёўскай вобласці, паводле слоў Людмілы Здорыкавай, вялася маштабна і грунтоўна. «Праведзена вельмі сур'ёзная, грунтоўная праца ў падрыхтоўцы ўсіх устаноў адукацыі Магілёўскай вобласці да пачатку новага 2026/2027 навучальнага года, – падкрэсліла начальнік галоўнага ўпраўлення па адукацыі аблвыканкама. – У кожнай установе прайшлі капітальныя і бягучыя рамонты. Асаблівую ўвагу, як і ў папярэднія гады, удзялілі ўмацаванню спартыўнай базы: адрамантаваны бегавыя дарожкі на школьных стадыёнах, а ў трох установах адукацыі Асіповіцкага і Крычаўскага раёнаў праведзены капітальныя рамонты спартыўных збудаванняў».

Значныя рэсурсы былі накіраваны і на мадэрнізацыю харчаблокаў. «Дастаткова вялікія сродкі патрачаны на абнаўленне матэрыяльнай базы нашых харчаблокаў, на закупку тэхналагічнага, халадзільнага абсталявання», – адзначыла Людміла Яўгенаўна.

Усяго на падрыхтоўку школ да 1 верасня, толькі па ўстановах агульнай сярэдняй адукацыі, затрачана каля 46 млн. рублёў.

Сёлета ў арганізацыю школьнага харчавання ўводзіцца важная навіна. Калі раней катэгорыі дзяцей дзяліліся па ўзроставым прынцыпе, то зараз у аснове дзялення ляжыць клас: з 1–га па 5–й, з 6–га па 8–й, з 9–га па 11–й. Як растлумачыла начальнік галоўнага ўпраўлення, гэта дае арганізатарам харчавання магчымасць быць больш мабільнымі і рэагаваць на запыты навучэнцаў, на ўлік іх смакавых пераваг.

Акрамя таго, у школьных сталовых пачнуць больш актыўна прымяняць паўфабрыкаты беларускай вытворчасці з высокай ступенню гатоўнасці. Гэта, па задуме, дазволіць разнастаіць меню. Павысяцца і грашовыя нормы на харчаванне, з'явіцца магчымасць устаноўкі вендынгавых апаратаў. «Усё для таго, каб харчаванне дзяцей было, па–першае, здаровым, а па–другое, прывабным для нашых дзяцей», – падкрэсліла Людміла Здорыкава.

Асаблівую ўвагу сёлета ўдзялілі аснашчэнню навучальных кабінетаў сучасным абсталяваннем. У школах вобласці ўводзіцца новы занятак, на якім дзеці будуць вучыцца на практыцы прымяняць штучны інтэлект. «З'явяцца факультатывы, якія будуць знаёміць хлопцаў з асновамі кіравання беспілотнымі лятальнымі апаратамі», – распавяла Людміла Яўгенаўна, дадаўшы, што гэта патрабуе пэўных фінансавых укладанняў.

Галоўным падарункам да новага навучальнага года для жыхароў абласнога цэнтра стане адкрыццё абноўленага будынка сярэдняй школы №6 горада Магілёва. «Гэта ўжо, з упэўненасцю можна сказаць, ультрасучасны будынак, у якім усё зроблена па апошнім слове і тэхнікі, і патрэбнасцей», – падзялілася Людміла Здорыкава.

Чатырохпавярховы будынак складаецца з трох блокаў: асобна для старэйшай і пачатковай школы. Тут створана вельмі добрая, моцная спартыўная база, каб навучэнцам было цікава вучыцца, праяўляць свае здольнасці, развівацца. Школа разлічана на 1020 навучэнцаў. Сёлета за парты ў новай установе сядуць каля 800 навучэнцаў. «Гэта мікрараён хутка расце, на перспектыву там ідзе актыўнае будаўніцтва, таму я думаю, што ў наступным годзе школа выйдзе на свае магутнасці», – адзначыла начальнік упраўлення.

Як адзначыла Людміла Здорыкава, пытанні бяспекі дзяцей застаюцца прыярытэтнымі і знаходзяцца пад пільным кантролем: «Значная ўвага нададзена абсталяванню нашых устаноў адукацыі сістэмамі кантролю доступу, аўтаматычнымі пажарнымі апавяшчальнікамі. Каб установы адукацыі былі зонай бяспечнага знаходжання дзяцей».

У гэтым годзе ў рамках забеспячэння бяспекі ўводзяцца новыя меры. Аднак, як падкрэслiла Людмiла Здорыкава, «нельга сказаць, што гэта нейкiя рэвалюцыйныя змены». Усе ўстановы адукацыі ўжо забяспечаны трывожнай кнопкай, а там, дзе навучаецца больш за 700 навучэнцаў, фізічную ахову ажыццяўляюць работнікі Дэпартамента аховы. Гэта існуючая практыка.

«Мы ўсе павінны разумець, што гэта не нейкі капрыз, гэта патрэбнасці часу, і кожны з бацькоў павінен усведамляць: калі дзіця пайшло ў школу, то маці, тата павінны быць спакойныя, што дзіця знаходзіцца ў бяспечным асяроддзі», – растлумачыла начальнік галоўнага ўпраўлення па адукацыі аблвыканкама. Яна заклікала бацькоў з разуменнем паставіцца да змушаных дадатковых мер засцярогі. «Я не думаю, што гэта будзе нейкая асаблівая праблема, якая выкліча асцярогі. Прынамсі, ніякіх нязручнасцяў для нашых навучэнцаў гэта не прынясе», – рэзюмавала яна, правёўшы паралель з леташнім досведам абмежавання выкарыстання тэлефонаў у школах. Тады новаўвядзенне таксама спачатку сустрэлі з насцярожанасцю, але год паказаў, што гэтае рашэнне спрыяльна паўплывала і на адукацыйны працэс, і на жывыя зносіны дзяцей адзін з адным.

Юлія Таранава, фота Галіны Гаўрыловіч