Хакеісты «Дынама-Шынніка» паўторна абгулялі «Крылы Саветаў» у МХЛ

Хакеісты бабруйскага «Дынама-Шынніка» атрымалі другую перамогу ў бягучай дамашняй серыі рэгулярнага чэмпіянату Маладзёжнай хакейнай лігі.

У нядзелю падапечныя Андрэя Міхалёва ў другі раз за два дні прымалі маскоўскі клуб «Крылы Саветаў». Сустрэча пачалася для гаспадароў не лепшым чынам - «шыннікі» атрымалі шайбу ў свае вароты ўжо на саракавой секундзе, а праз дзве хвіліны прапусцілі зноў. Праўда, яшчэ да перапынку наша каманда нівеліравала адставанне дзякуючы галам Міраслава Міхалёва і Арсенія Чухраева.

У другім перыядзе бабруйчане зноў выявілі сябе ў становішчы адсталых, але Мікіта Жыхараў даволі аператыўна лічбы зраўняў - 3:3. Гэты рахунак трымаўся на табло практычна да канца асноўнага часу, але за паўтары хвіліны да фінальнай сірэны масквічы, здавалася, вырвалі перамогу. Тым не менш, часу, які застаўся, беларусам хапіла на выратаванне, сустрэчу ў авертайм перавёў Ілля Лахноў.

Напярэдадні каманды дагуляліся да серыі булітаў, у якой дакладней аказаліся гаспадары (3:2). На гэты раз дынамаўцы да пасляматчавых кідкоў справу не даводзілі - два ачкі нашай камандзе прынёс Сцяпан Звягін - 5:4. Гэты вынік яшчэ больш абвастрыў барацьбу за трапленне ў плэй-ін Захаду ад Сярэбранага дывізіёна: другую і шостую каманды падзяляюць усяго 4 балы, «Дынама-Шыннік» пакуль чацвёрты. Наступны матч бабруйчане правядуць 24 студзеня дома супраць бліжэйшага праследавацеля «СКА-Юніёра».

БЕЛТА