Ігар Каско: лепш, чым на роднай зямлі, нідзе не будзе - і працаваць трэба тут, і карысць прыносіць, і дзяцей нараджаць, і жыць разам са сваімі сем'ямі

Пасяджэнне пастаяннай камісіі па пытаннях сацыяльнай сферы, сацыяльнай абароны грамадзян і справах моладзі Магілёўскага абласнога Савета дэпутатаў правёў 26 чэрвеня яе старшыня, галоўны ўрач абласной дзіцячай бальніцы Ігар Каско. У якасці дакладчыкаў і судакладчыкаў у ім прынялі ўдзел намеснік начальніка аддзела па рабоце са СМІ і маладзёжнай палітыцы галоўнага ўпраўлення ідэалагічнай работы і па справах моладзі аблвыканкама Таццяна Меньшыкава, намеснік начальніка аддзела выхаваўчай работы і аховы дзяцінства галоўнага ўпраўлення па адукацыі аблвыканкама Алена Клімянкова грамадскага аб'яднання «БРСМ» Алег Бойка.

Дэпутацкі корпус вынес на парадак дня пытанні аб рабоце органаў мясцовага кіравання і самакіравання па патрыятычным і духоўна-маральным выхаванні моладзі ў сучасных умовах, а таксама - аб сістэме работы органаў мясцовага кіравання і самакіравання, устаноў адукацыі і маладзёжных аб'яднанняў па арганізацыі вольнага часу і летняй занятасці дзяцей і моладзі.

«Сёння падчас паседжання камісія разгледзела пытанні ідэалагічнай працы нашых органаў выканаўчай улады, тэрытарыяльнага мясцовага самакіравання па ўзаемадзеянні з моладдзю, з дзецьмі, а таксама па арганізацыі летняга працоўнага семестра, - распавёў Ігар Каско. - Мы ўзнімалі пытанні, якія ў першую чаргу важна абмеркаваць для захавання міру і спакою на нашай зямлі. Акцэнтуючы ўвагі на ўразлівых кропках, каб прадухіліць разнастайную актывізацыю нашых нядобразычліўцаў на дзеянні па дэстабілізацыі сітуацыі ў краіне. І таму асаблівая ўвага была накіравана на работу з моладдзю - пошук новых форм і метадаў. Абмяркоўвалася і тэма, як прыцягнуць моладзь да таго ж інфармацыйнага складальніка нашага жыцця, як арганізаваць, напрыклад, распаўсюджванне сродкаў масавай інфармацыі ў больш зручнай і прывабнай для сучаснай аўдыторыі форме. Абмяркоўваліся таксама моманты па арганізацыі забаўляльнай занятасці маладых людзей, у тым ліку - дзяцей і падлеткаў, у летні перыяд і ў працэсе навучальнага семестра. Таму што на сённяшні дзень асноўная задача - данесці, растлумачыць нашым хлопцам, што лепш, чым на роднай зямлі, нідзе не будзе. І працаваць трэба тут, і карысць прыносіць, і дзяцей нараджаць, і жыць разам са сваімі сем'ямі на сваёй зямлі. Нам чужога не трэба, але і сваё важна шанаваць і прымнажаць».

Таму, як падкрэсліў старшыня камісіі, дэпутацкім корпусам і ўзнімаліся сёння вострыя пытанні, якія патрабуюць неадкладных рашэнняў: «Мы іх абазначылі перад нашымі органамі выканаўчай улады, упраўленнямі аблвыканкама. Абмяркоўваліся, сапраўды, надзённыя праблемы. Бо зараз асноўная бітва ў свеце ідзе нават не столькі за матэрыяльныя рэсурсы, хаця і за іх б'юцца, вядома, аднак асноўная барацьба вядзецца за рэсурсы чалавечыя. Мы выразна бачым, як паціху адбываецца разгойдванне грамадства ў розных сферах. І асноўная наша задача - забяспечыць у нашай краіне мір, парадак і спакой. У тым ліку, праводзячы паседжанні нашых камісій канструктыўна, абменьваючыся меркаваннямі і назіраннямі адносна той сітуацыі, якую мы бачым, тых зваротаў грамадзян, якія паступаюць. Каб гэтыя надзённыя пытанні, якія існуюць, аналізаваць і перад нашымі органамі выканаўчай улады ставіць пэўныя задачы, паказваючы ачагі напружання, якія існуюць і якія неабходна вырашаць. Гэта асноўнае, што мы зараз можам зрабіць», - падсумаваў ён.

Юлія Таранава, фота Галіны Гаўрыловіч