Ігар Луцкі: СМІ неабходна кансалідавана адстойваць пазіцыю дзяржавы

СМІ неабходна кансалідавана адстойваць пазіцыю дзяржавы, заявіў журналістам намеснік кіраўніка Адміністрацыі Прэзідэнта Ігар Луцкі. Ён прымае ўдзел у I Форуме медыйнай супольнасці Беларусі «СМІ ў эпоху цыфравізацыі».

«Учора адбылася сустрэча Прэзідэнта з парламентарыямі, іншымі дзяржаўнымі людзьмі, экспертнай супольнасцю. І прагучала адна такая вельмі важная фраза ад кіраўніка дзяржавы: пранікнуцца сітуацыяй сённяшняга дня. На мой погляд, гэта быў зварот да нас – журналістаў, медыйнай супольнасці. Таму што на самай справе вельмі многае залежыць ад таго, як аператыўна і дакладна мы раскажам нашым людзям аб тым, што адбываецца. Я ўжо не кажу пра тое, што адбываецца па-за тэрыторыяй Рэспублікі Беларусь, якую інфармацыйную атаку на нас распачалі. Але сёння трэба вельмі тонка, выразна растлумачыць тое, што адбываецца ў свеце і краіне. Прэзідэнт учора адзначыў працу сродкаў масавай інфармацыі. І я лічу, што нам нельга расслабляцца ні на секунду», – сказаў Ігар Луцкі.

Паводле яго слоў, сённяшні фармат новы. «Мы прывыклі традыцыйна праводзіць выставу. Але журналіст моцны словам, моцны пяром. І настаў час пагаварыць аб тым, што адбываецца ў медыйным полі краіны. Пра тое, як нам сумеснымі намаганнямі не толькі тут у Мінску, але і ў рэгіёнах (а тут вельмі шмат прадстаўнікоў рэгіёнаў) кансалідавана адстойваць пазіцыю дзяржавы, пазіцыю краіны, пазіцыю суверэнітэту. Ён непарушны. Яго нельга падвяргаць сумненню. Вы бачыце, што адбываецца. Падзеі, якія ў Латвіі адбыліся, далі нейкі пэўны штуршок, я нават сказаў бы, кансалідацыі грамадства вакол дзяржаўнай сімволікі. Дзяржаўная сімволіка – гэта атрыбуты дзяржавы, гэта частка дзяржавы. І я б заклікаў усіх, можа быць, да нейкай акцыі, флэш-мобу, выказаць сваё меркаванне, сваю пазіцыю па адносінах да нашай сімволікі. Гэта вельмі важна сёння – згуртавацца ўсім і быць адзінымі», – адзначыў намеснік кіраўніка Адміністрацыі Прэзідэнта.

Ігар Луцкі таксама зачытаў прывітанне Прэзідэнта ўдзельнікам, гасцям і арганізатарам форума.

Для ўдзелу ў форуме запрошана больш за 200 прадстаўнікоў рэспубліканскіх і рэгіянальных сродкаў масавай інфармацыі, медыяэксперты, удзельнікі школы маладых журналістаў. На пленарным пасяджэнні і тэматычных дыскусіях плануецца абмеркаваць найбольш актуальныя пытанні развіцця айчынных медыя, ролю і месца дзяржаўных СМІ ў інфармацыйнай бяспецы краіны, прэзентаваць перадавыя практыкі працы беларускіх і расійскіх рэдакцый ва ўмовах цыфравізацыі.

БЕЛТА