Каля 350 спартсменаў сталі ўдзельнікамі першынства і чэмпіянату Беларусі па каратэ ў Магілёве

Каля 350 спартсменаў сталі ўдзельнікамі першынства і чэмпіянату Беларусі па каратэ ў Магілёве. Спартыўныя спаборніцтвы праходзяць у Магілёве на працягу двух дзён на базе спартыўнага комплексу «Алімпіец».

У першы дзень спаборніцтваў на татамі спартыўнага комплексу стартавала першынство Беларусі па каратэ сярод кадэтаў, юніораў і моладзі. Сёння, на другі дзень, праходзіць чэмпіянат Беларусі па каратэ сярод дарослых. «На два чэмпіянаты колькасць удзельнікаў складае прыблізна 350 чалавек. Учора быў вельмі напружаны дзень для нашай моладзі. Гэта быў важны турнір для юнакоў, бо па выніках будзе праводзіцца адбор у зборныя і нацыянальныя каманды. Прэстыжна стаць першым на такіх спаборніцтвах, таму што дае магчымасць потым выязджаць на міжнародныя старты, - расказаў галоўны суддзя спаборніцтваў Аляксандр Краевіч. - Працягвае спаборніцтвы чэмпіянат Беларусі па каратэ сярод дарослых, які таксама з'яўляецца адным з важных чэмпіянатаў для нацыянальнай каманды. Тут хлопцы змагаюцца за званне наймацнейшага ў краіне».

Міністр антыманапольнага рэгулявання і гандлю, старшыня Беларускай федэрацыі каратэ Аляксей Багданаў адзначыў, што сёння ў спартыўным комплексе «Алімпіец» спаборніцтвы ідуць у такім жа фармаце, як гэта будзе ў жніўні. «Мы праводзім бягучыя чэмпіянаты ў тэставым рэжыме. Адпрацоўваем усе тэхнічныя пытанні, глядзім узаемасувязь па лагістыцы і перамяшчэнню спартсменаў, каб усё было гатова да прыёму нашых гасцей з розных краін. Найважнейшае, акрамя арганізацыйных пытанняў, паглядзець нашу моладзь, нашых спартсменаў, якія будуць прадстаўлены на II Гульнях краін СНД ва ўзроставых катэгорыях ад 18 да 24 гадоў. І тут асноўная ідэя - падцягнуць наш рэзерв, нашых маладых спартсменаў, якім ужо хутка давядзецца змяніць вопытны і сталы склад нацыянальнай зборнай. Таму такія спаборніцтвы праходзяць з прыцэлам на будучыню. Каб наша маладое пакаленне, ужо набраўшыся досведу, пасля адмены санкцый змагло заваёўваць медалі на міжнародных спаборніцтвах».

Па словах Аляксея Багданава, беларускія спартсмены дэманструюць высокія вынікі на спаборніцтвах рознага ўзроўню. Што немалаважна - каратэ працягвае быць папулярным відам спорту ў дзяцей і моладзі. «Бацькі з вялікім задавальненнем аддаюць дзяцей у каратэ. Бо яно вучыць павазе і дысцыпліне - каратэ пачынаецца і заканчваецца паклонам. Акрамя таго, тут фармуецца характар чалавека. Гэта складаны каардынацыйны від спорту, ён гарманічна развівае чалавека з розных бакоў: як фізічна, так і духоўна», - падсумаваў ён.

БЕЛТА