13.10.2023 - 09:35

У Рэспубліканскім цэнтры алімпійскай падрыхтоўкі «Стайкі» завяршыўся чацвёрты рэспубліканскі турнір па міні-футболе сярод непаўналетніх, адносна якіх праводзіцца індывідуальная прафілактычная работа, паведамілі ў прэс-службе МУС.

Па выніках спаборніцтваў на верхнюю прыступку п'едэстала гонару ўзнялася каманда Магілёўскай вобласці. На другім месцы мінчане, на трэцім - прадстаўнікі Віцебскай вобласці. Пераможцам і прызёрам уручылі кубкі, медалі і граматы. Усе ўдзельнікі турніру атрымалі падарункі і сувеніры ад Прэзідэнцкага спартыўнага клуба, міліцэйскага ведамства, дабрачынных арганізацый.

«Дэвіз турніру «Разам да перамогі» цалкам адпавядаў духу футбольных баталій. Ва ўпартай барацьбе хлопцы паказалі выдатныя якасці будучых абаронцаў Радзімы - імкненне да рэзультату, цягавітасць, згуртаванасць. Для нас як арганізатараў важны вынік спаборніцтваў. Яны далі магчымасць падлеткам з розных рэгіёнаў пазнаёміцца, паразмаўляць, набыць новых сяброў. Упэўнены, далей у кожнага ўсё складзецца добра і яны будуць законапаслухмянымі грамадзянамі», - адзначыў на цырымоніі ўзнагароджання першы намеснік міністра ўнутраных спраў - начальнік міліцыі грамадскай бяспекі Юры Назаранка.

У завяршэнне рабят чакалі паказальныя выступленні курсантаў факультэта ўнутраных войскаў Ваеннай акадэміі, невялікі канцэрт ад ведамасных музыкантаў. Сваё майстэрства валодання скураным мячом прадэманстравалі футбольныя фрыстайлісты.

БЕЛТА