Кінапаказы «Афганскі залом: праз 30 гадоў» адбудуцца ў лютым у кінатэатрах Магілёва

Кінапаказы «Афганскі залом: праз 30 гадоў» адбудуцца ў лютым у кінатэатрах абласнога цэнтра. Пра гэта паведамілі ў Магілёўскім дзяржаўным прадпрыемстве «Кінавідэапракат».

У мерапрыемствах возьмуць удзел воіны-інтэрнацыяналісты. Будзе паказаны мастацкі фільм «Афганскі залом» (ваенная драма, СССР, Італія, 1991 г.). Сеансы пройдуць 14 лютага ў 12.30 у кінатэатры «Радзіма», 16 лютага ў 10.00 у кінатэатры «Космас», 19 лютага ў 14.00 у кінатэатры «Ветразь».

Штогод у Беларусі 15 лютага адзначаюць Дзень памяці воінаў-інтэрнацыяналістаў. 30 гадоў таму савецкія войскі былі выведзены з Афганістана. Праз гарніла той вайны прайшло больш за 28 тыс. беларусаў, у тым ліку 3,5 тыс. ураджэнцаў Магілёўшчыны. 118 нашых хлопцаў так і не вярнуліся дадому. 585 ўзнагароджаны ордэнамі, 186 – медалямі «За адвагу». Асобным радком у гісторыю афганскай вайны пасмяротна ўпісана імя магілёўца, Героя Савецкага Саюза Андрэя Мельнікава, які служыў у той самай 9-й роце, фільм пра якую зняў вядомы рэжысёр Фёдар Бандарчук.