Кірмашы, казачныя паказы і канцэрты: стала вядома, як у Магілёве адзначаць Новы год

Праграму гарадскіх навагодніх і калядных мерапрыемстваў зацвердзілі ў Магілёве. Пра гэта расказалі ў аддзеле ідэалагічнай працы і па справах моладзі Магілёўскага гарвыканкама.

Стварэнне святочнай атмасферы пачнецца ў абласным цэнтры ўжо 4 снежня з кірмашу «Настрой у падарунак», на якім можна будзе купіць тэматычныя сувеніры, упрыгожванні і падарункі. Выстава-продаж размесціцца на плошчы Адзінства і працягнецца да 5 студзеня.

Шэраг навагодніх і калядных мерапрыемстваў у Магілёве адкрыюць 14 снежня ў 15.00 на плошчы Адзінства. Тут жа будзе дадзены старт рэспубліканскай акцыі «Нашы дзеці», якая запусціць серыю дабрачынных мерапрыемстваў для дзяцей-сірот і дзяцей, якія засталіся без апекі бацькоў, а таксама інвалідаў і дзяцей са шматдзетных сем’яў.

Цырымонія запальвання агнёў на галоўнай ёлцы Магілёва адбудзецца 17 снежня ў 17.30. Пасля таго як на плошчы Леніна зімовая прыгажуня загарыцца яркімі агеньчыкамі, магілёўцы і госці горада ўбачаць казачнае прадстаўленне «Таямніца навагодняй ёлкі». На наступны дзень, 18 снежня, у 12.00 у парку Падміколле адкрыецца інтэрактыўная пляцоўка «Казачны дом Дзеда Мароза».

З 25 снежня па 16 студзеня ў выставачнай зале Музея гісторыі Магілёва пройдзе гарадскі конкурс дэкаратыўна-прыкладнога мастацтва і выстава «Каляравая скарбонка».

Навагодняе дабрачыннае свята для выхаванцаў гарадскога цэнтра карэкцыйна-развіваючага навучання і рэабілітацыі адбудзецца 23 снежня а 14.00. Дзяцей-сірот і дзяцей, якія засталіся без апекі бацькоў, запросяць на свята ў абласны цэнтр творчасці. Прадстаўленне адбудзецца 24 снежня а 11.00. У гэты ж дзень дзецям, якія знаходзяцца ў сацыяльна небяспечным становішчы, пакажуць мюзікл. Мерапрыемства пачнецца а 14.00 у гімназіі-каледжы мастацтваў імя Я. Глебава.

Заслужаны калектыў краіны Магілёўская гарадская капэла дасць 24 снежня а 16.00 навагодні канцэрт «Зімовыя фантазіі». Ад музычнага прадстаўлення можна будзе атрымаць асалоду на першым паверсе гандлёвага цэнтра «Атрыум». Агульнагарадское свята «Чараўніцтва ў навагоднім парку» адбудзецца 25 снежня з 13.00 да 18.00 у парку Падміколле.

Калядны турнір па міні-футболе «Ура – канікулы!» сярод дзяцей 2009 года нараджэння і маладзейшых пройдзе ў Цэнтры творчасці дзяцей і моладзі «Агат» 28–29 снежня. Адразу некалькі мерапрыемстваў запланавана на 29 снежня: а 11.00 у эколага-біялагічным цэнтры дзяцей і моладзі запланавана экалагічная гасцёўня «Калядныя чаяванні», а 16.00 у сацыяльна-педагагічным цэнтры Кастрычніцкага раёна адбудзецца навагодні дабрачынны ранішнік для выхаванцаў гарадскога дзіцячага прытулку.

Сустрэча Новага года ў Магілёве «Жадаем шчасця ў новым годзе!» пройдзе з 31 снежня па 1 студзеня на плошчы Адзінства. Мерапрыемства будзе доўжыцца з 23.30 да 1.30. У навагоднюю ноч танцавальна-забаўляльныя праграмы будуць арганізаваны на некалькіх адкрытых пляцоўках абласнога цэнтра. Так, з 1.00 да 3.00 злавіць рытм можна на вул. Грышына, 87 (пляцоўка ля ДК ААТ «Магатэкс»), вул. Аўтазаводскай, 1 (каля ДК філіяла ААТ «БелАЗ») і па пр-це Пушкінскім, 10 (каля кінатэатра «Космас»). Навагодняя праграма «ЁлкаДэнс» працягнецца на плошчы Адзінства з 18.00 да 21.00.

На другі дзень Новага года, 2 студзеня, магілёўцаў запросяць на казачнае прадстаўленне для дзяцей і дарослых «Навагодні карагод», якое пачнецца ў парку Падміколле а 13.00.

У парку Падміколле з 7 па 9 студзеня будзе арганізаваны навагодні кірмаш «Калядны сувенір». Святочныя гулянні «Калядныя ўзоры» пройдуць тут жа 7 студзеня з 12.00 да 16.00. На наступны дзень, 8 студзеня, у парку адбудзецца казачнае прадстаўленне для дзяцей «Зіма – пара цудаў». Час правядзення – з 12.00 да 13.00.

БЕЛТА