У спарткомплексе «Раўбічы» з 10 па 14 студзеня 2024 года праходзіў адкрыты Чэмпіянат і Першынство Беларусі па лыжных гонках. Клімаўчанка Ганна Мачахіна зноў з медалямі.
Узнагароды турніру аспрэчвалі пяцьдзесят наймацнейшых спартсменаў. У першы дзень спаборніцтваў прайшоў спрынт у класічным стылі на 1500 метраў. І як жа радасна паведаміць, што Ганна Мачахіна, выйграўшы гонку, атрымала залаты медаль. Аня проста вырвала перамогу ў доследнай канкурэнткі Ганны Каралёвай, пра што гаворыць час: 3:38.09 супраць 3:39.07.
- Я да гэтых гонак вельмі шмат бегала ў Расіі ў гонцы, таму, можна сказаць, трэніроўкі і спаборніцтвы - гэта мая падрыхтоўка была. Мы выступаем у Расіі, і там вельмі шмат сапернікаў, канкурэнтаў, - сказала пасля пераможнай гонкі чэмпіёнка краіны.
Так, сапраўды: расійскія лыжнікі адны з наймацнейшых у свеце. Спаборніцкая практыка з імі вельмі важная для росту спартыўнага майстэрства. І жадаецца падкрэсліць, што наша зямлячка не толькі спаборнічае з расейкамі на роўных, але і нярэдка апыняецца на пастаменце пашаны.
У чацвер, 11 студзеня, праграму спаборніцтваў працягнулі гонкі з раздзельнага старту на 10 км вольным стылем. Тут клімаўчанка заняла другое месца, прапусціўшы наперад калегу па зборнай Ганну Каралеву і саступіўшы ёй крыху больш за паўхвіліны. У суботу 13 студзеня адбыліся спрынтарскія гонкі вольным стылем. І на гэты раз Ганна Мачахіна таксама прыйшла другой, услед за цёзкай Ганнай Каралевай.
Завяршалі спаборніцкую праграму гонкі з масавым стартам на 20 кіламетраў. У сапраўдную «зарубу» дзвюх Ганн ператварыўся гэты забег. У фінішным створы Каралева апынулася ўсяго на дзве секунды раней за Мачахіну.
Пры гэтым трэба адзначыць, што наша Аня ўчорашняя юніёрка. Але яна ўжо даўно зарэкамендавала сябе і ў дарослым спорце. Так, летась на такіх жа спаборніцтвах клімаўчанка ўзяла два золата па юніёрах: у спрынце на 1,5 км класічным стылем і ў індывідуальнай гонцы на 10 км канькавым ходам, а таксама заваявала серабро ў гонцы на 20 км з масстартам сярод жанчын.
І, вядома ж, нашы віншаванні яе маці і першаму трэнеру Тамары Хомчанка. Тамара Цімафееўна ў мінулым і сама добрая лыжніца. Цяпер, з'яўляючыся трэнерам Клімавіцкай ДЮСШ, яна падрыхтавала нямала таленавітых спартсменаў, пераможцаў і прызёраў абласных і рэспубліканскіх спаборніцтваў.
rodniva.by, фота ctv.by, rider-skill.ru
