Конкурс касцоў, выстава фігур з сена. Рэгіянальны фестываль «Сенафэст» пройдзе ў Кіраўскім раёне

У Кіраўскім раёне 21 чэрвеня пройдзе рэгіянальны фестываль «Сенафэст». Аматары народных свят і традыцый збяруцца на беразе ракі Друць, расказалі ў Кіраўскім райвыканкаме.

У праграму «Сенафэсту» ўвойдуць розныя культурныя і забаўляльныя мерапрыемствы - выстава фігур з сена і іншых прыродных матэрыялаў, прэзентацыя сенакоснага інвентара, дэгустацыя страў традыцыйнай беларускай кухні, конкурсы касцюмаў і вянкоў, майстар-класы па вырабе лялек і сувеніраў з сена і саломы.

Увазе гасцей і ўдзельнікаў фестывалю таксама будзе прапанавана забаўляльная гульнявая праграма для дзяцей і канцэрт фальклорных калектываў раёна. На працягу ўсяго дня на святочнай лакацыі будуць працаваць выставы майстроў дэкаратыўна-прыкладнога мастацтва.

У райвыканкаме адзначылі, што на мерапрыемстве адбудзецца рэканструкцыя народнага абраду «Сенны пояс», які таксама звязаны з касавіцай. Па старажытнай традыцыі старэйшае пакаленне мужчын выйдзе абкошваць участак зямлі. У гэты час жанчыны сплятуць з скошанай травы доўгі пояс, загаворваючы яго падчас прац на поспех і багаты ўраджай. Лічыцца, што гэты рытуал накіраваны на еднасць і дабрабыт.

Самай яркай і запамінальнай падзеяй фестывалю стане конкурс касцоў, які складаецца з двух камандных этапаў - касьба на хуткасць і стагаванне сена, а таксама індывідуальнага заліку «Ювелірная касьба», на якім журы трэба будзе вызначыць асабістае майстэрства кожнага ўдзельніка.

«Фестываль ужо даўно стаў візітнай карткай раёна, - падкрэслілі ў райвыканкаме. - Мерапрыемства дапамагае адраджаць беларускія народныя традыцыі і садзейнічае пераемнасці пакаленняў. Заяўкі на ўдзел будуць прымацца аж да пачатку «Сенафэсту», прычым толькі прадстаўнікамі Кіраўскага раёна арганізатары не абмяжоўваюцца - выпрабаваць свае сілы ў гэтым незвычайным спаборніцтве можа кожны ахвочы. Мінімальная колькасць удзельнікаў у камандзе - тры чалавекі. Гэта могуць быць як мужчыны, так і жанчыны».

БЕЛТА