Конкурс відэаролікаў па ахове працы праводзіць прафсаюз работнікаў аховы здароўя ў Магілёўскай вобласці

Прафсаюзны конкурс відэаролікаў па ахове працы праходзіць у Магілёўскай вобласці. Аб гэтым паведамілі ў Магілёўскай абласной арганізацыі Беларускага прафсаюза работнікаў аховы здароўя.

Арганізатар прапануе ўдзельнікам конкурсу праявіць свае крэатыўныя і творчыя здольнасці, раскрываючы тэму прафілактыкі траўматызму.

Абласны конкурс праходзіць у тры этапы - зараз ідзе актыўны прыём заявак, які працягнецца да 16 верасня. Дасылаць відэаролікі можна будзе з 1 да 31 кастрычніка, а вынікі падвядуць 11-12 лістапада.

«Мэта нашага конкурсу - павысіць культуру бяспекі сярод медыцынскіх работнікаў. Удзельнікі павінны стварыць крэатыўнае відэа, і ў ім паказаць важнасць захавання правілаў аховы працы», - патлумачыла галоўны тэхнічны інспектар працы галіновага прафсаюза Наталля Войтава.

Да ўдзелу ў конкурсе запрашаюцца члены прафсаюза сістэмы аховы здароўя Магілёўскай вобласці. Відэаролік павінен быць арыгінальным, працягласцю да паўтары хвіліны і адпавядаць маральна-этычным нормам.

Для пераможцаў падрыхтавалі дыпломы і каштоўныя прызы. Вынікі конкурсу будуць апублікаваны на сайце галіновага прафсаюза і ў сацыяльных сетках.

БЕЛТА