13.02.2026 - 09:45

Выстава «Магілёўскія дзённікі Канстанціна Сіманава» адкрылася ў Музеі Славы Магілёўшчыны. На ёй наведвальнікі могуць убачыць абарону Магілёва вачыма пісьменніка і вайсковага карэспандэнта.


Загадчык экспазіцыйна-выставачнай залы Музея Славы Магілёўшчыны Мікалай Ляпкоў расказаў:

- Выстава - гэта гісторыя пра мужнасць людзей, якія стаялі насмерць на гэтым жмутку зямлі. І, вядома, пра Канстанціна Сіманава, які разам з фотакорам Паўлам Трошкіным у ліпені 1941-га быў на Буйніцкім полі і адным з першых распавёў праўду пра гераічную абарону Магілёва ўсёй краіне ў нарысе «Гарачы дзень», апублікаваным у «Известиях». Ключавыя моманты абароны Канстанцін Сіманаў зафіксаваў у сваіх франтавых дзённіках. Да гэтай тэмы ён неаднаразова вяртаўся ў пасляваенны час, дапоўніўшы іх пазнейшымі каментарамі і разважаннямі. Так з'явіліся кнігі «Сто сутак вайны», «Розныя дні вайны».


Мастацкае ўвасабленне тэма знайшла і ў трылогіі «Жывыя і мёртвыя». Гэтую кнігу з дароўным надпісам удаве палкоўніка Сямёна Куцепава, які ў рамане стаў правобразам генерала Серпіліна, можна ўбачыць у Музеі Славы Магілёўшчыны. Як і курыльную трубку пісьменніка.


«У мяне ёсць кавалачак зямлі, які мне век не забыць, - поле пад Магілёвам», - казаў Канстанцін Сіманаў, які нярэдка прыязджаў у гэты горад. Пасля смерці пісьменніка тут у 1980 годзе ўстанавілі мемарыяльны камень. Па завяшчанні Канстанціна Сіманава яго прах развеялі над легендарным полем.


Зразумець, чаму пісьменнік у канцы жыцця прыняў такое рашэнне - назаўжды застацца з загінуўшымі героямі магілёўскай абароны, дапаможа выстава, якая працягнецца да 29 сакавіка.

СБ